Lap ka KSU ba ka surok sha Mawthabah, dei ka surok tih Uranium

Shillong, 7 Risaw:
Kumba 500 ngut ki paidbah ki la tuid sha ka jingialang ba la pynlong da ka Khasi Student Union South West Khasi Hills kaba la long mynta ka sngi ha pdeng Iew jong ka Iew Mawkyrwat. Shuwa ban sdang ka jingialang ka la don ka jingiaiaid Proseshon naduh na Sngap Syiem College ter ter shaduh ka jaka pynlong jingialang. Ka jingialang ka la neh lai kynta shiteng sdang naduh ka por 12 baje shiteng sngi haduh 3:30 baje janmiet.
Ha katei ka jing ialang ka KSU ka la pynsngew ba hadien ba la mih ki jingkynthoh na u myntri sorkar pdeng u Dr.Jitendra Singh uba bat ia ka tnad Atomic Energy ba ka sorkar ka dang iaid shakhmat ban pyrshang ban tih ia ki mar pohkhyn dew (Pre-Mining Avtivities), katei ka seng ka la wad ia ki kot ki sla ban pynshisha ia ka jingthmu ban tih Uranium hapoh West Khasi Hills. Ka KSU ka la ong ba ka ioh ia ki kot ki sla na ka ministry of Road & High Way ba ka surok 2 Lane kaba wan na Nongstoiñ sha Mawthabah ka dei ka surok na ka bynta ban tih ia u Uranium ne kata kaba ki ong ha ka ktien nongwei ka Pre Mining Avtivities.
Shuh shuh katei ka seng ka la pynrem ia u bah Rowell Lyngdoh, myntri rangbah ba-ar ka jylla uba bat ruh ia ka tnad Aiñ ka sorkar bad uba dei ruh u MLA ka Mawkyrwat ha kaba katei ka seng ka la ong ba dang ha ka taiew ba la dep u bah Rowell u la leit sha Umdohlun ban pynlong jingialang paidbah bad ha katei ka jingialang paidbah u la ong ba ka jingwan ka surok kam dei na ka bynta ka jingtih Uranium, “Ngi pynrem ia u bah Rowell bad ngi dawa ba nangne shakhmat um dei shuh ban leit pynsngewthuh bakla ia ki paidbah” ong u General Secretary ka KSU SWKH u samla Forwardmen Nongrem.
Ha kaba ia dei pat bad ka jingwad jaka ki shipai BSF lyngba ki ejen jong ki, utei u samla u la ong ba katei ka jaka ka dei kaba shongsuk shongsaiñ bad ym donkam ia ki BSF ba kin wad jaka hangtei hynrei u la ong ba ka jingwad jaka ki BSF ka dei tang ka buit ba kin ioh ban ker ban da ia ki briew bad ki kompeni kiba leit ban tih Uranium.
Katei ka jingialang ka la rai ba kan ieng pyrshah beit la ha kano kano ka dur ruh ban pyrshah ia ka jingtih Uranium bad ka la rai ruh ba nangne shakhmat kan leit ban pynlong jingialang paidbah kylleng ki jaka kum sha Nongstoiñ bad kiwei ki jaka shuwa ba kan shim ia ki lad jingiakhih kiba tyngeh. Ki nongkren kiba ai jingkren ha katei ka jingialang ki kynthup ia u Marking G Lyngdoh (VP LYWA), Marcony Thongni (Organising Secy KSU SWKH ), Shemphang Nonglang (president KSU Umdohlun Circle), Andrias Lyngdoh (GS LYWA), Lambok Marngar (Finance Secy KSU CEC) , Auguster Jyrwa (GS KSU CEC), Samuel Jyrwa (Chairman NESO) bad la pyniaid da u Samla F. Nongrem(GS KSU SWKH).