Lap ka KSU, ba bun ki skul ha Bhoi, kim don nonghikai, dawa thung mardor

Nongpoh:U Samla Ferdynald K. Kharkamni, Presidenr ka KSU, North Khasi Hill District Unit, u la pynpaw ka jingsngewkhia kaba jur eh, hadien ba ka seng ka la ioh jingtip ba ki don shibun tylli ki skul ha Ri Bhoi, kiba ym don nonghikai bad halor katei ka jingbym don Nonghikai, utei u heh nongialam ka KSU ha Ri Bhoi, u la pynpaw ba ka seng ka dawa na ka sorkar ba ka dei ban thungkam noh mardor ia kito ki nonghikai, kiba dei ban hikai ha kito ki skul kiba ym don Nonghikai.

Utei u nongialam ka KSU ha Ri Bhoi, u la ong ba ka seng ka la ioh jingtip ba ki don bun ki skul sorkar ha Ri Bhoi, kiba kynthup naduh ha ki kyrdan Lower Primary bad Upper Primary, kim don ia kita ki Nonghikai kiba la thung da ka sorkar, ha kaba ka seng ka sngew ba na katei ka jingbym don nonghikai, kan sa wanrah ia ka jingduhnong kaba khraw ia kito ki khynnah skul kiba leit ban wad jingstad na kiba kum kitei ki skul.

Haba batai shai halor katei ka jingbym don Nonghikai ha ki skul sorkar, u Samla Ferdynald K. Kharkamni, u la ong ba ka seng lyngba ka Education Cell, ka la ioh jingtip ba ki don ki skul sorkar ha Ri Bhoi, kiba ka don tang ka skul khlem ki Nonghikai, kumta lyngba katei ka jinglap ka seng, ka la pynsngewlyngoh shikatdei eh ia ka seng, da kaba buh jingkylli ruh ia ka sorkar, ba kumno ki buh ia ki skul khlem ki Nonghikai.
Halor katei ka nongrim, ka KSU ka la byrthen ba kan iai buddien bad ha kajuh ka por ka dawa na ka Deputy Commissioner ka Ri Bhoi, ba kan thung da ka Magisterial enquiry khnang ban ioh jingtip kaei ka daw kaba la pynlong ia ka sorkar ba kan nym lah ban thung Nonghikai ha kiba bun tylli ki skul sorkar ha Ri Bhoi District.

Namarkata, ka seng kan dang iai lum jingtip bad ha kajuh ruh ka por ka dawa na ka sorkar jylla ba ka dei ban thung Nonghikai noh ha kiba kum kitei ki skul bym don Nonghikai, namar lada don tang ki skul khlem ki Nonghikai bad khamtam eh ha ki skul Nongkyndong, kan wanrah ia ka jingduhnong kaba khraw ia kito ki khynnah skul, kiba ki kmie ki kpa ki phah ha kiba kum kitei ki skul kiba ym dong Nonghikai, u la bynrap.