Shillong, 11 Nohprah:
Ka rukom treikam jong ka tnad ka koit ka khiah ka jylla la lap ba kam shym la don jing kyrmen eiei pynban na ka bynta ka jingmyntoi u paidbah kane ka jylla ha kaba ia ka jaka ba dei ban sumar ia kiba ia kynduh ia ki jingjia aksiden ne kata ka jaka kaba la tip kum ka Accident and Trauma centre la pyn kylla pynban ia ka kum ka ophis jong u District Medical & Health Officer bad la lap ruh ia ka mashin ban leh X Rays la shu ieh rynghang ha katei ka jaka la kumba 15 snem eiei mynta. Nalor katei la lap ba ka pisa kaba haduh T.13klur tyngka kaba la mang da ka North Eastern Council (NEC) na bynta u snem 2013-14 ban pynbha ia ka tnad ka koit ka khiah ha kane ka jylla ka la shu sah ryngheng ha ka NEC namar ba ka tnad ka koit ka khiah ka jylla kam shym la lah ban pyndep ia ka Detail Project Report. Ia kane la lap da ka Estimates Committee (EC jong ka State Legislative Assembly kab ala khlieh da u bah D.D Lapang kum u Chairman jong ka ha ka jingleit jurip mynta ka sngi thohdieng ia kitei ki jaka sumar.
Ki dkhot jong katei ka komiti kiba la leit jurip mynta ka snig sha Ri-Bhoi ki kynthup ia u Chief Whip ka sorkar jylla u bah R.V Lyngdoh, u MLA ka UDP u ba hJemino Mawthoh, u MLA ka NPP u Hihim D Shira, bad u MLA ka HSPDP u bah Witting Mawsor. Kitei ki dkhot kiba la ialam da u bah Lapang ki la leit jruip ia ka Accident & Trauma Centre kaba don ha Nongpoh Civil Hospital bad kumjuh ruh ia ka Umsning Community Health Centre (CHC). “Ngi lap ba ia ka ing jong ka Accident & Trauma Centre ha Nongpoh Civil Hospital la pynkylla kum ka ophis jong u District Medical & Health Officer (DMHO),” ong u bah Ronnie V Lyngdoh.U ba Ronnie u la ong ba katei ka jingleh ka la pynduh noh ia ka jingmut jong ka jingtei ia katei ka ing kaba lah ban ai jingiarap ha ka por ba jia ki aksiden khamtam katei ka dei ka National high Way ba ju khia khah khah ki jing aksiden. U la ong ba ka NEC ka la mang T.1 klur tyngka ban shna ia katei ka Centre ha u snem 2003-04, hynrei ia ki jingdonkam pat kum ka X-Ray, ki Ventilator, ki OT Table la shu buh ha kawei ka kamra khlem da pyndonkam, “Bun ki mynsiem lah ban pyllait im jin lada pyntreikam ia ka” ong u bah Ronnie. U bah Ronnie u la ong ruh ba ka NEC ka la mang mar T.80 lak tyngka ban tei ia kaba kum katei ka Centre ha Jowai bad Tura, bad u la ong ba ia katei ruh shen ka komiti kan sa leit ban jurip ban lap kaei ka jinglong jingman jong ka.Ha kaba iadei pat bad ka jingjurip ia ka CHC ha Umsning u la ong ba ia ka X-Ray mashin la thied naduh u snem 2000 hynrei haduh mynta ym shym la pyntreikam satia. “ U doktor hangto u la ong ba lada donkam ban X-Ray ia kinongpang hap phah sha Shillong , ka long kaba sniew bok ban iohi ia kane ka jinglong jingman ka tnad ka koit ka khiah” ong u bah Ronnnie bad u la bynrap ruh da kaba ong ba ka komiti kan buddien bha ia katei ka kam shuwa ba kan phah ia ka ripod. Ha kajuh ka por u la ong ba haduh mynta ka mang tyngka jong ka NEC ia kane ka jylla ha u 2013-14 ka long haduh T.13 klur tyngka hynrei haduh mynta ka pisa ka dang don sah bad ka NEC.Na katei ka T.13 klur u bah Ronnie u la ong ba ka dei ruh na ka bynta ban pynbha ia ka OT ha Ganesh Das Hospital , katba T.9 klur ka dei na ka bynta ban tei ia ka Mother & Child health Centre ha Khliehriat , East Jaintia Hills District.
“ Kane baroh ka dei tang na ka daw ba ka tnad ka koit ka khiah kam shym la lah ban phah ia ka DPR, ka tnad ka koit ka khiah ka die ban leh eiei noh ban pynthikna ba ka pisa kan dei na ka bynta ka jingmyntoi u paidbah” ong u bah Ronnie.Utei u dkhot jong ka komiti u bah Lapang uba dei ruh u Chief Whip ka sorkar jylla u la ong ba T.2.20 klur la mang na ka bynta ban tei ia ka jaka pynduna khun ne ka infertility centre ha Polo, Shillong . U la ong ba ia ka kam la khot kontrak naduh u snem 2013 bad la ai ruh ia ka kam sha kawei ka kompeni ba la tip kum ka Sanbha Medicals. Hynrei kaba lyngngoh u la ong ba ka tnad ka koit ka khiah ka la pynsangeh ia katei ka kompeni ba kan sdang ia ka kam, ar taiew mynshuwa u la ong ba ka komiti ka la hukum ia katei ka tnad ba ka dei ban phah sdang noh ia ka kam hapoh ka shi taiew, hynrei haduh mynta u la ong ba ka komiti ka dang la ka tnad ka koit ka khiah ka sngap ne em ia katei ka hukum.
Phi don ban ong eiei?