Lap ka KHNAM, ba mut ai jaka sha ki Air Force

Shillong, 10 Jylliew:
Ka KHNAM Youth Wing ka la lap lyngba ka ain wad jingtip paidbah, ba ki bor shipai ki la phah thymmai ia ka jingtyrwa sha ka sorkar ba kan ai jaka ia ki. U President ka Youth Wing jong ka KHNAM u bah Thomas Passah u la ong ba ki don lai tylli ki jingtyrwa ba ki shipai ki la phah sha ka sorkar na ka bynta ban ioh jaka. U bah Passah u la ong ba ka ki shipai suin, ki la pan jaka haduh 18 akar kaba dei ka jaka jong ka tnad   Animal Husbandry and Veterinary na ka bynta ban shna ia ki jaka pynneh mariang.
Katkum ka ain wad jingtip paidbah, u la ong ba u myntri rangbah ka jylla uba dei ruh u President jong ka Board u la khot ia ka jingialang jong ki shipai suin, ka tnad ri jingri , ka tnad Revenue bad u Deputy Commissioner ka East Khasi hills, ban ia kren halor katei ka jingpan jaka ki shipai. “Ngi pyrshah ia ka rai ka sorkar ban ai ia ka jaka kaba 18 akar kaba don ha Upper Shillong sha ki shipai suin” ong u bah Passah. U la ong ba ka KHNAM ka la leit ban ia kynduh ia u Director ka tnad ri jingri u Dr. J.S Jyrwa ban pynaw ia ka jingpyrshah ia katei ka jingthmu. Katkum ka jingong u bah Passah u la ong ba u Director katei ka tnad ruh u la iathuh ba ka tnad ka pyrshah jur ia katei ka jingthmu ai jaka ka sorkar sha ki shipai suin ha Upper Shillong. Ka KHNAM ka la kam ba ka sorkar ka la rai ban ai ia katei ka jaka sha ki shipai ha ka jingialang jong ka Rajya Sabha Board kaba la khlieh da u myntri rangbah kaba la long ha ka 4 tarik u nohprah, 2014.
Shuh shuh u la ong ba ka tnad shipai ka la phah jingtyrwa sha ka sorkar ba kan ai jaka 10 akar ka jingheh hapoh ka jaka ba hap ha Cantonment na ka bynta ba kin shna ia ka jaka shong jaka sah ia ki shipai ba la shong thait, bad ka KHNAM ka la ong ba kane ka kam ruh mynta ka dang sah ha ka jingiapynbeit bad ka tnad Urban Affairs . Ka KHNAM ka la ong ba ka la lap ruh lyngba ka RTI ba u myntri rangbah u la ai bor ia ki shipai ba kin ia krendalade hi markhmat bad ki Rangbah Shnong na bynta ka jaka kaba ki kwah kaba heh 8 haduh 10 akar ha New Shillong Town ship na ka bynta ka Air Force Naval Housing Board. “Da lei lei ruh, ngin ym ailad ia ka sorkar ba kan ai jaka sha ki shipai” ong u President ka KHNAM Youth Wing.