Lap ka HNYF ba pyniaid bakla ki MDC, ia ki skhim JHADC

Shillong, 12 Jylliew:
Ka Hynniewtrep National Youth Front (HNYF) ka la kynoh ba la don ki MDC jong ka Jaintia Hills Autonomous District Council (JHADC) kiba pynkhein ia ka kyndong jingburom niam da kaba shah shiliang ha ka jingsam skhim na ka MDC Scheme.
Haba kren hynne sha ki lad pathai khubor, publicity secretary ka HNYF (central body) u Bah Donbok Dkhar u la ong ba u MDC ka South Jowai constituency u Bah D Nongpluh u la pynkhein ia ka nongrim jong ka jingngeit niam da kaba ai skhim ban shna ia ka community hall ha Chiliang Raij, Jowai bad ia kane, la pynmih da u secretary ka Chiliang Raij, Jowai.
Ka jingtrei ka long T. 42,000 bad la ai na ka MDC Scheme 2009-10, u Bah Dkhar u la ong ba ia kane la shem katkum ka jinglap na ka RTI Act, 2005.
U la ong ba u dkhot jong ka JHADC u Bah C. Biam na Nangbah constituency, u la ai T. 20,000 ban shna ia ka community hall jong ka Presbyterian Church ha Kyndong Tuber. Kane ka skhim ka dei jong u snem 2011-12.
Ha Sutnga constituency, u MDC u S. Shadap ha u snem 2012-13, u la ai T. 30,000 ban shna ia ka lynti iaid kjat sha Narwan Presbyterian Church, la ong u Bah Dkhar.
“Kine ki jingleh jong ki MDC ki pynkhein ia ki kyndon jingiaburom niam kumba la bsuh ha ka riti synshar ka ri”, u la ong.
Ha kajuh ka por, u Bah Dkhar u la kynnoh ba la don ruh ki nongtrei sorkar bad ki heh saipan nongkhaii kiba ioh skhim MDC ban pynbha ia ki lyngkha kba, ha Raliang constituency kaba dei kaba mihkhmat da u N. Lamare. Kane ka dei ka skhim jong u 2009-10.
Shuh shuh, u la kynnoh ba ym don nongioh bynta na ka CGI sheet ne ka tin ha Raliang constituency ha u snem 2012-13 watla ha ka kot, la tnoh ba la ai.
U Bah Dkhar u la kynnoh ruh ba la jia ha ka Shangpung constituency ba la mih khmat da u Bah W.B. Shadap.
Katkum ka jingong u bah Dkhar, ki MDC ki ioh skhim T. 6 lak man ka snem ban pyntreikam ia ki kam jong u paidbah hynrei ym don skhim ha u snem 2010-11 namar ka jingduna pisa.
“Katkum ka jinglap ka RTI, ngin leit iakynduh ia u Lat ka jylla u R.S. Mooshahary bad ruh ia u myntri ka district council affair u Bah H.D.R. Lyngdoh ban iathuh ia kane ka jingjia bad ban ai jingpynshitom ia ki MDC ba pyndonkam bakla ia ka skhim” la ong u Bah Dkhar.