Lap ka HNYF ba la trei dep ka Assam, ia ka surok PMGSY, ha shnong Balakhwa

Nongpoh:Ki nongialam bad ki dkhot ka HNYF Northern Region, kumjuh ruh ki dkhot ka HNYF Women’s Wing, myn hynnin ka sngi, ki la leit ban jurip ia ka surok PMGSY kaba la wan ban shna da ka Assam ha shnong Balakhwa, kaba dei kawei na ki shnong khappud ha Ri Bhoi, kaba hap hapoh ka Hima Nongspung bad Jirang Constituency bad ha katei ka jingleit jurip, ki la lap ba katei ka surok ka la dep lut baroh.

Lah ruh ban kdew hangne, ba halor katei ka surok PMGSY ka Assam ha Balakhwa, ki la don shibun ki kynhun seng kiba la pyrshah halor katei surok kaba la wan pyntrei da ka Assam ha katei ka shnong, da kaba kam ba katei ka jaka ka dang hap hapoh u pud u sam ka Meghalaya. Nalorkata haba iadei bad katei ka surok, ka la don ruh kawei ka jingjia kaba sngewsih bad kata ka long ba u Bah Michael Warjri (Bam kwai ha dwar u Blei) Secretary ka Hima Nongspung, u la shah shoh ha ki paidbah bad shah pynjulor ruh ka iing jong, tang namar ba u pyrshah ia katei ka surok ka Assam ba kan rung sha Meghalaya.

Ka long ruh ka jingshisha, ba baroh ki heh na ka sorkar jylla bad District Council ruh kumjuh, ki la hiar ban jurip, kata hadien ka jingshah ktah kti ia u Bah Michael Warjri (Bam kwai ha dwar u Blei), ha kaba ha man ba ki heh ki leit jurip ia katei ka jaka, ki da kam ruh ba katei ka jaka, ka dang hap hapoh u pud u sam ka Meghalaya.

Katei ka surok PMGSY kaba la dep mynta, shipor ka la shah pynsangeh ban pyntrei ha ki kynhun seng na Meghalaya, hynrei ka Assam ka la shu sangeh tang shipor, pynban lait nangta ka pyntrei beit bad tad haduh ba la dep syndon mynta.

Haba iadei bad katei ka bynta, u Bah Marcus Marten, President ka HNYF ha Ri Bhoi, u la pynrem halor ka jingmynthi ka sorkar jylla bad uba la ong ruh ba ka jingthmu ka Assam ban pynpoi surok sha katei ka thain, ka long ban kyntur ia u pud u sam ka jylla Meghalaya.

U la ther tyngeh ruh ia ka sorkar jylla bad District Council, halor ka jingsngap jar jong ki halor ki kam kyntur pud ka Assam, da kaba pyni ruh ba lada ka sorkar jylla ka thmu ban pynpoi ia ki kam pynroi sha ki shnong khappud, bunsien hi ka Assam kam ailad satia bad ka ju pynpra beit.