Nongpoh: Ki dkhot ka HNYF, 20Mer Circle, hynnin ka sngi ki la pynlong ia ka jingleit khynra ia ki kot ki sla jong ki bar jylla kiba la wan ban khlong Shyiap ha ka Wah Umtrew, Lailad ha Ri Bhoi bad ha kane ka jingkhynra ki dkhot ka HNYF, ki la lap ba baroh na kitei ki bar jylla kiba la trei ha katei ka jaka, kim shem la don ia ki kot ki sla kiba biang, hynrei ki don tang katto katne ngut kiba la lah ban pyni kum ia ki Pan Card bad Epic.
Ha kane ka jingleit khynra bar jylla, kaba la ialam da u Bah Paul Wahlang, President ka HNYF, 20 Mer Circle, ha ryngkat ka jingdonlang u Bah Iaineh Wahlang, Organizing Secretary ka HNYF, Northern Region lem bad bun ngut ki dkhot ka HNYF.
Haba pyntip sha ki Nongthohkhubor, u Bah Paul Wahlang, u la ong ba ha kane ka sngi ki la leit ban jurip ia kiba bun tylli ki jaka sei Shyiap na katei ka Wah, ha kaba la lap ba bun na kitei ki bar jylla kim lah don ia ki kot ki sla kiba biang, kumta haba iadei bad kane na ka liang ka seng ka la maham tyngeh ia ki ba ki dei ban mih noh shisyndon na katei ka jaka.
Shuh shuh, u la ong ruh ba ka seng hi ka sngewkhia ban iohi ia ka jingioh laitlan ki bar jylla ban wan rung shapoh ka jylla, ha kaba ki ioh ban rung bad ban trei ha ki jaka bapher bapher, wat haba kim don ia ki kot ki sla kiba biang bad kane hi ka la pynpaw ia ka jingsynjor halor ka rukom talasi ia ka rung ka mih jong ki bar jylla.
Haba iadei bad kane ka kam khynra ia ki bar jylla bym don kot don sla, ka seng kan sa leh tyngeh bad nangne shakhmat kan sa pynlong ia ka jingkhynra ha kiba bun ki jaka ym tang ha katei ka thain hynrei ha ka Distrik hi baroh kawei.
Khadduh eh, ka seng ka kyntu ruh ia ka sorkar jylla ba ka dei ban pynstet noh ha ka ban tei ia ka Entry bad Exit point, khnang ban tehlakam ia kiba kum kitei ki bar jylla, kiba la ioh ban wanrung suk shapoh ka jylla, u la bynrap.