Lap ka CORP, CSWO ba trei khlem licence ki dkhar ha EPIP Umiam

Shillong, 28 Nailar:
Ka CORP Umiam Circle bad ka CSWO (I) ka la lap ba bun bah ki dkhar kiba treikam ha ki kompeni bapher bapher kiba don ha Export Promotion Industrial Park (EPIP) kaba don ha Umiam, Ri Bhoi District.
Kine ki ar seng ki la lap ia kine ki dkhar ha ka jingleit jurip hynne ka sngi. Kine ki ar tylli ki seng, ki la lap ha kitei ki karkhana ki jyllei bha ki bar jylla kiba wan ban bylla sngi, khlem ki kot ki sla ki sla kiba biang kum ki labour license ne EPIC.
Ki karkhana kiba pynlong ia ka jingjurip ki long ka MDH Beverage Private Ltd, ha kaba la lap kumba 50 ngut ki bar jylla kynthei. Hadien ka jingtohkit bniah na ki Manager ia ki kot ki sla jongki, la lap ba tang 14 ngut ki don labour licence ba la ai da ka KHADC, katba ha SM Poly Park ki don 15 bad ha Mawlong Saw-Cum Veneer Mill ki don 35 ngut ki bym don ki kot ki sla bad kiba bun ki dei na ki thain Upper Assam.
“Ki bar jylla, kiba wan trei bylla hapoh upud usam ka Meghalaya ki dei ban don ka labour licence bad ki trai shnong ki dei ban don ia ka EPIC ban pynshisha,” la ong ki nongialam ka CORP hapoh ka jingialam u Secretary Eastern Zone, bah Korbius Lyngdoh, President Umiam Circle, bah Samlang W Pdahkasiej bad ka Genl Secrertary CSWO, Kong Christabell Wanniang lem bad kiwei ki dkhot.
U Bah Sam bad ka kong Christabel ki la maham ia kitei ki bar jylla ki bym don ki kot ki sla ba kin leit leit phai noh sha la ki shnong bad kim bit ban dangiai bteng ia ka jingtrei bad kumjuh ruh ki la ai por ia ki karkhana ha katei ka thain baroh ban pynbiang ia ki kot ki sla hapoh shibnai bad lada ki danglap hadien kin sa leh da kaba tyngeh pyrshah ia ki.
Kine ki ar seng ki la pynlong ia ka jingjurip da ka mynsiem sngewkhia ia ka jingwan rung kyrthep jong ki bar jylla ki la pynlong ia katei ka jingjurip ia ki karkhana ha Umiam, bad la lap ba katei ka jaka ka long kum ka ktem rieh tngen ki bar jylla ne ki riew sniew.
Ki la ong, ba ki kloi ban iatreilang bad ka Dorbar shnong Umiam na bynta ka bha ka miat bad ka suk ka sain hapoh shnong bad khamtam ban tehlakam ia ka jingwan rung ki bar jylla. Halor kane ka jingioh mon ban rung ban mih ki bar jylla kin sa leit ban iakynduh ia ki heh ka tnad labour ka sorkar jylla.