Lap ka AJHSWO ba dkoh ka PHC Nongbah

Shillong, 22 Risaw:
Ka seng All Jaintia Hills Social Welfare Organisation (AJHSWO), ki la wan ban jurip ia ka PHC ha Nongbah ha kine ki sngi bala dep. ka seng ka la wad jingtip na ki katto katne ngut ki nongtrei jong katei ka PHC bad ka la lap ba don shibun ki jingduna ha katei ka PHC ha ka jingiadei bad ka jingduna kawei ka kam Doktor bad ym don ka kali Ambulance bad kumjuh ruh bym biang ki dawai ki dashin.
Kane ka buh ka jingeh kaba khraw ia u paidbah namar kane ka PHC ka kdup haduh 6 tylli ki shnong nongkyndong ba heh kiba kynthup ia ka Mihmyntdu, Sabahmuswang, Ialong, Mookaswan, Mupliang bad Myrjai, namar ki PHC ha nongkyndong ki dei u budlum jong ka ioh ka kot. Te halor kine ki jingeh jong ki paidbah ha ka jingiadei bad ki jingbym biang katei ka PHC ka seng ka la leit buh iaka dorkhas sha u D.H.S (M.I) ka koit ka khiah lyngba u DH&MO Jaintia Hills District u Dr. I.Tongper.
Halor kine ki nongrim ban pynioh iaka Ambulance, ban pynioh doktor kum ha ka Homeopathic lane Ayurvedic, ban pynbiang ia ki dawai dashin bad ban pynioh jaka sah kaba biang ia ki doktor ne ki Nurse.   Ka seng ka don ka jingkyrmen kaba skhem ba une u heh jong ka koit ka khiah un don ka jingkit khlieh naka bynta ki paidbah kiba hap hapoh katei ka PHC. Pynkut ka kyrwoh na u President ka seng u samla R.Biam.