Lap jaka sangeh Lieng ha Lawkyntang Sohra Rim

Shillong, 7 Nohprah:
U bah John F Kharshiing u la lap ia ki ar tylli ki jaka sangeh lieng ha Law kyntang kaba kyrteng ka Law Lieng ha ka shnong Sohra rim, Hima Nongkhlaw, la lap ia katei ka khlaw ha ka por ba u bah John Chairman kadorbar ki khlieh nongsynshar ha ryngkat ka jingdonlang Paiem Kestonbel Manik Syiemlieh, Syiem Khynnah, ha ryngkat u Sordar, Secretary Shnong, bad kiwei ki riew shemphang ki la leit ban iuh kjat hapoh katei ka Law Kyntang – Law Lieng, ha ka 5 tarik u nohprah. Katei ka shnong ka don kumba 35 kilomitar na sor Shillong.Katei ka jingleit wad jingtip ka long shibynta ban lum ban wad bniah ban thoh bad ban pynshlur ia ki nongpyniaid Kur, ki Dorbar Shnong, Dorbar Raid bad ki Dorbar Hima ban buh ki jingthoh kiba bniah halor ki jingtip shaphang  kitei ki Law Kyntang. Katkum ka jingiathuh khana ki rangbah jong ka Shnong Sohra Rim, ki ong ba la iathuh da ki long shuwa ba mynshuwa lehse hajar snem mynshuwa la wan sangeh ar tylli ki lieng ha katei ka jaka bad la buh ruh ia ka Law Kyntang ha katei ka juh ka jaka. Na ka liang u Bah John F Kharshiing, Chairman, u la ong ba kane ka jingshem bad ka jingiathuh khana pateng kaba la hiar la bun pateng ka dei kaba donkam bha ban da wad bniah namar kan sa long ka jingshem ka jingwad ka ban wanrah ia kiba bun ki riewstad saian ban wan iuh kjat bad ban wad ia ka jingshisha jong katei ka jingiathuh khana, namar kitei ki jingiathuh khana pateng lada dei kaba shisha ki pynpaw ba katei ka jaka Sohra Rim ka la shah tap um teng lane ka lah ban long kaba la don shapoh duriaw bad la mih shajrong na ka jingkhih u jumai, lane da kiwei pat ki rukom kumba lap ki riew stad ha kiwei ki bynta jong ka pyrthei.U Paiem KM Syiemlieh, Syiem Khynnah, Hima Nongkhlaw, u la mynjur ban iatrei lang bad ka kynhun Society for Promotion of Indigenous Knowledge and Practice (SPIKAP) ban wanrah ka jingpynjanai halor ka jingsumar ia katei ka Law Kyntang Law Lieng, hapoh Shnong, Sohra Rim, Hima Nongkhlaw.