Lap ia u khyllung ba dang kha na Paiñkhana

Shillong, 3 Risaw:
Mynta ka step ha ka por 8 baje eiei la lap ia u khyllung ba dang shu kha na kawei ka paiñkhana kaba don sha lyndet ka ophis jong ka Atomic Minerals Directorate kaba don ha Umkdait kaba hap hapoh Nongmensong PS. Ia utei i khyllung la rah noh wut wut sha Ganesh Das Hospital, Shillong ban phah eksamin.
U OC ka Nongmensong PS u L.D Sangma u la ong ba haba peit ia itei i khyllung ba la shah ieh ha paiñkhana, i kumba i dei I khyllung ba dang shu kha dang shisngi eiei,hynrei u la ong ba haduh mynta ki pulit ki dang ap ia ka ripod bad ka jingtohkit ka dang iaid ban lap ia ki kmie ki kpa jong itei I khyllung.
La iathuh ba ka Meghalaya State Commission for Protection of Child Right ka la hukum ia ki ophisar ka district child protection ban leit wut wut sha Ganesh Das Hospital bad hadien ba la dep ban leh ia kaba donkam , ka Commission kan sumar ia kitei I khyllung.