Nongpoh: Ki pulit ka Byrnihat Police Outpost, mynta ka sngi ki la leit ban shimti noh ia ka metiap jong uwei u rangbah, uba la thiah iap hapoh ka shuki kaba u shong ha ka jaka treikam jong u kaba don ha Ozygen Plant kaba don ha Byrnihat, Ri Bhoi District.
Ia katei ka metiap, la lap nyngkong da uwei na ki nongap pahara hapoh katei ka karkhana, ha kaba u la lap ba utei u rangbah uba la tip kum u Ramprasad Neogi, u la thiah iap hapoh kawei ka shuki bad la lap ruh ba utei u rangbah uba la iap, u don ia ki dak mynsaw ha ki bynta ka khlieh.
La ong ba utei u rangbah u la trei mynta ka kumba 20 snem ei ei hapoh katei ka karkhana pynmih lyer Oxygen, ha kaba la ong ruh ba hynnin ka miet ha ka por 10 baje ei ei mynmiet, utei u rangbah, u don ha ka kamram ha ki kam miet, hynrei ha ka por 11 baje ei ei mynmiet, haba u nongap pahara u la leit ban talasi ia baroh ki bynta katei ka karkhana, u la lap pynban ba utei u rangbah u la thiah iap hapoh kawei ka shuki, ha ryngkat ki dak mynsaw ha ki bynta ka khlieh.
Haba iadei bad katei ka jingjia bad kaba la suba jur ba utei u rangbah, u la shah pyniap dusmon ha ki runar. Ki Pulit ki la dep ban Register ia ka case bad haduh mynta la ioh ban kem ia uwei na kiba la iatreilang hapoh katei ka karkhana, hynrei watla katta ka jingtohkit halor katei ka jingjia kan dang iai shakhmat.
Phi don ban ong eiei?