Lap ia ka metiap u ophisar IB bad u nongkhaii jaiñ

Shillong, 25 Risaw:
Ia ka metiap jong uwei u ophisar ka tnad Intelligence Bureau bad kumjuh ruh ia ka metiap jong u wei u nongkhaii jaiñ kiba la shah rahbor shibnai mynshuwa ha ki lehnoh Garo la lap ha ka sngi saitjain jong ka taiew na kawei ka jaka kaba don ha South Garo Hils District. “Ngi la lap ia ka metiap jong u IB ophisar u Bikash Singh bad uwei u nongkhkaii jain u Kamal Saha, kiba la shah rahbor ha ka seng lehnoh A’chik Songna An’pachakgipa Kotok (ASAK), ngi la lap na kawei ka khlaw ha ki thaiñ ka South Garo Hills” ong u heh pulit ka jylla u Rajiv Mehta haba ia kren bad ki ladkhubor. U la ong ba ka kynhun pulit ba la ialam da u DSP Chauenlai Sangma ki la lap ia ka metiap na kawei ka thliew kaba jngai tang kumba 2 kilomitar na ka shnong Bolchugre ka jaka kaba jngai kumba 450 kilomitar na Shillong. “Ngi la khlong ia ki metiap bad ngi la pynkit sha Baghmara ban pyndep ia ka jingdonkam” ong u Mehta. Lah ban kdew ba kitei 2 ngut ki la shah rahbor ha ka 24 tarik u nailur, 2015 da kaba pynap suloi ia ki ha kawei ka jaka kaba don hapdeng ka shnong Ampangre bad ka Panda katba ki dang don ha lynti ban leit sha Baghmara kiba la shong da ka kali paidbah.
Katba ka CSWO pat lyngba ka President jong ka kong Agnes Kharshiing ka la ong ba katei ka jingshah pyniap u ophisar ka tnad IB ka la buh jingma ia ki ophisar kiba wan ban shakr ha kane ka jylla, ka la dawa ban ai tohkit ha ka National Investigation Agency (NIA) halor katei ka jingiap ki 2 ngut. Ka kong Agnes ka la kynnoh ba ka la ioh jingtip ba kaba kum katei ka jingpyniap bad ka jingap thap ki riew thrang snam ka dei ka jingdonkti jong ki heh pulit bad ki mafia dewiong kiba ia ju ia sam ia ka bhah hapdeng jong ki.Ka la ong ruh ba u Bikash Kumar u ophisar ka tnad syntiat u la ioh kawei ka jingtip kaba donkam bha ha nongbah Shillong bad mar kumta hi la pynkynriah ia u sha Garo Hills. “Ki jingpyniap briew bad ki nongleh kam sniew la pyndonburom da ki President Medal ne ki state Medal ha kane ka jylla katba ki ophisar kiba trei hok ki shah kynjat sharud kumba kynjat phutbol ne ki shah pyniap” ong ka kong Agnes Kharshiing. Ka la pynpaw ba ka kwah ba ka NIA kan tohkit bniah ioh ba ia ka mobile utei u ophisar ruh la Tap ban tip ia ki kam jong u.