Nongpoh:Myn hynnin ka sngi ha ka por 2 baje ei ei nohphaisngi, ki riew paidbah ki la lap ia ka metiap jong kawei ka samla lud kaba kaba la thiah iap ha kawei ka Wah rit kaba don hajan ka NRL Pump jong ka shnong Mawsmai kaba don ha ki thain Jerobad ha Ri Bhoi.
Ka metiap jong ka samla kaba la ioh tam na kawei ka Wah rit hajan ka NRL Pump ha Mawsmai
Katkum ka jingtip kaba la iohlum da u Nongthohkhubor, la ong ba ha kaba nyngkong eh ia ka metiap jong katei ka samla la lap da uwei u khynnah bad utei u khynnah u la leit pyntip pat sha ki nongialam shnong ka Mawsmai. Hadien kata pat ki nongialam shnong ki sa pyntip sha ki bor Pulit.
La suba jur ba katei ka samla kaba la lap na katei ka jaka, ka dei kaba la shah pyniap lane shah leh dusmon ha ki runar ha kawei pat ka jaka, ha kaba ynda ki la dep ban leh ia ka kam ki sam wan bret pat ha katei ka jaka.
Ka la don ruh ka jingsuba kaba sniew kaba jur bha, namar katkum ki dak ki shin kiba la paw na katei ka samla, la ong, la ong ba katei ka samla ka la shah teh ia ki kjat bad don ki dak mong ha ki durkhmat bad kaba kham palat eh ka dei hadien ba shiteng na ki sopti phong jong ka ka kim don shuh.
Ka jingtip kaba la ioh ban lum na ki nongshong shnong ha katei ka jaka, la ong ba katei ka samla ka dei na ka jaid bynriew Burman bad kaba la don kumba 21 snem ei ei bad ka dei ruh kaba shong basah hajan ka Northeast Cancer Hospital kaba don hajan jong katei hi ka shnong.