Chandigarh: Ki nongleit jingleit kiba wan na Italy bad hiar khyndew ha Amritsar, ha ki khyndiat sngi ba ladep, ki la khie bitar jur, halor ka rukom test covid ha katei ka nongbah, namar ba kiba bun na ki, ki ioh positive, ynda la test ha katei ka kad liengsuin ha Amritsar.
Kitei ki nongleit jingleit, haba ki sngew artatien, kumta, ki la phah test biang bad ynda la test sa shisien, ki lap pynban, ba kim dei satia kiba don ia ka jingpang covid 19.
Mynta ka sorkar Punjab, ka la phah tohkit halor katei ka jingjia, kaba la jia, ha katei ka jaka test, kaba la pyniaid da ki riew shimet.
Lah ban pyn kynmaw, ba ha ki khyndiat sngi ba ladep, ki don ar tylli ki liengsuin, kiba wan na Italy bad kitei ki dei hapdeng ka 5 bad 6tarik Kyllalyngkot, ha kaba ha kawei ka liengsuin, ki don 175 ngut bad ha kawei pat, ki don 125ngut bad kitei ki wan phai na Rome sha Amritsar, ha kaba ki hiar khyndew ha Shri Guru Ramdas International Airport bad jan baroh na kitei ki nongleit jingleit, ki ioh ia ka kaiphod, ba ki don jingpang covid.
Kitei ki nongleit jingleit ki iathuh ba ha ka por, ba ki mih na Rome, ki la shah test da ka RTPCR bad ki long negative, hynrei, mar ia hiar ha Amritsar, haba la test biang ia ki, ki long positive pynban.
Phi don ban ong eiei?