Lap 55 tylli ki shynrong khlieh briew, jah rngai 190 ngut

Kathmandu, 7 Jylliew:
55 tylli ki metiap kiba la sah sa tang ki shyn rong bad 4 ngut na kitei dei ki bar ri, la lap da ki shipai ka Nepal ha ka jingbteng ban dang wad ia ki briew ba dang jah rngai hadien ka jingkhih jumai. Kitei ki 55 tylli ki shyn rong ki dei kiba la lap ha ki ar sngi ka sngi saitjain bad sngi u blei ha ki rud wah ka Langtang.
Katkum ka jingia thuh u Deputy Superintendent of Police Pravin Pokhrel, u la ong ba ki shipai ryngkat ki nong shong shnong ka Langtang ki la lap 55 tylli ki shynrong met briew na katei ka shnong, katba 128 ngut pat ki dei kiba la ioh ban pyllait im.
Ki nongshong shnong jong ka thaian Langtang ha Rasuwa district, ka jaka ba ju bna nam kim ka jaka kiew lum la iathuh ba ki don haduh 199 ngut ki briew kiba dang jah rngai naba katei ka shnong ka khyllem noh ha ka 25 tarik u iaiong ka sngi ba khyrwit u jumai bah ha Nepal.
Ka Rasuwa ka dei ka Distrik kaba la shah khyrwit tyngeh ha u jumai ha kine ki sngi ba la dep, ha kaba ki la don haduh 597 ngut kiba la iap bad 771 ngut kiba la mynsaw , bad ka bynta ba jur eh ha katei ka distrik ka dei ka thain Langtang.
Ki lad khubor ki la iathuh ba kiba dang jah rngai haduh mynta ki kynthup ia ki 10 ngut ki shipai ka Nepal ong u Laxman Thapa u heh jong ka Narayan Battalion ha katei ka thain. Ki kynthup ruh ia 70 ngut ki nongshong shnong , 40 ngut ki nongialam kai ia ki nongwan jngohkai pyrthei bad kiwei pat. Ia kiba la ioh pyllait im la pynkit noh Kathmandu.