Lap 2 tylli ki metiap na Mawiongrim, suba ba dei ki nongpahara ka Toyata

Shillong,3nailur: Mynta ka sngi ki pulit ka nongbah Shillong ki la lap ar tylli ki metiap kiba ym shym la ithuh durkhmat shuh, namarba la suba ba ka dei ka metiap kaba la shibnai tam. La lap ia kitei ki metiap na ka jaka kaba don  shadien jong ka jaka die kali ka Toyata, kaba hap hapoh ka Mawiongrim.

Haba ia kren bad u SP City u bah Vivek Syiem u la ong ba la suba jur ba kitei ki metiap ki lah ban dei  jong ar ngut ki nongpahara  jong katei ka jaka die kali, naba kitei ki ar ngut ki nongap pahara ki la jah rngai.Bad ba kitei ki metiap ruh ki jia hap bha bad ka rta jong kitei ki ar ngut ki Security.

Katkum ka jingiathuh u bah Vivek Syiem u la ong ba ki ar ngut ki nongap pahara ba la jah rngai ki dei kiba la shim wai da ka Toyata na ka Unique Security Service ki dei kiba la tip kyrteng kum u Emanuel D Sangma , 22 snem karta bad u Aminson D Sangma , 21 snem karta, hynrei haduh mynta ki pulit kim pat lah ban pynthikna bad ki dang khot ia ki bahaing jong ki ban wan pynshisha.