“Laodikaia”

AIS Suja

Laodikaia ne Laodicea, ka dei ka ktien Greek, ka jingmut jong ka ka long Public Opinion ne ka mon u paidbah. Kumta ka balang ha Laodikaia ka long ka Balang Mon u Paidbah. Kaba long ka Balang kaba la hap noh na ka jingngeit na ka ktien u Blei sha ka Mon u paidbah, bad kata ka Balang kam nud ban pynthut ne pynmong ia ki parabangeit bad la pyniaid ia kata ka Balang katkum ka jingkwah ki parabangeit.

Ka mut ym bit ban pyrshah ia kaei kaba ki padabangeit ki ong la ka dei ne ym dei, dei ban mynjur (compromise) beit. Ka dei kata ka Balang ba pyniaid da ka mon u briew ym na u Blei, da ka jingstad briew ym da ka jingstad Blei bad kam lah ruh ban leh ia ka mon u Blei.

U Blei u ong – “Nga ithuh kein ia ka jingleh jong pha, ba pham long kaba khriat ne kaba shit; ah nga da kwah dik dik ba phan da long kaba khriat lane kaba shit! Kumta naba pha long shu syaid, khriat ruh em shit ruh em, ngan sa prie ia pha na ka shyntur jong Nga”. Jingpynpaw 3:15-16. Balei ka long kumta? “Naba pha ong nga kaba riewbha bad nga la pynman spah, te ngam don jingkyrduh ei ei ruh em, bad pham tip ba ma pha hi pha long kata kaba lanot khop, bad kaba jynjar sat, bad kaba duk bad kaba matlah, bad kaba lyngkhuit” Jingpynpaw 3:17.

Ka mut hangne, bun ki Khristan ki sngew ba ki sngew riewbha sngew riewblei ha la ka jingsngew, ki dap ki biang ha ka spah ka burom jingnang jingstad, katba kim don ei ei kaba kynja mynsiem hapoh ka mynsiem ki long tang ki Khristan kiba don kyrteng tang hapoh kata ka Balang ba la pyniaid da u briew ne u paidbah ym da ka jingtrei u Mynsiem u Blei, kiba ialeh pyrshah ia ka ktien u Blei kiba pynkylla khongpong ia ka ktien u Blei khlem da iaid katkum ka ktien u Blei, bad ki shem lanot khop bad jynjar sat namar ka jingmatlah ba kynja mynsiem jong ki. Ka daw ka long namar ki pynsngewbha ia ki briew ym ia u Blei bad kim lah ruh ban long kita ki shakri jong u Khrist.

Dei halor kane kajuh ka nongrim ba u Apostol Paul ha ka shiti sha ki nong Galatia u ong – “Namar hato mynta nga bhoh ia ki briew ne ia u Blei? lane nga wad ia kaba pynsngewbha ia ki briew? lada nga dang pynsngewbha ia ki briew, ngam shym long u shakri u Khrist” Galatia 1:10.
Lada ka Balang ka iaid da ka jingsngew briew bad ban pynsngewbha tang ia u briew kata ka mut ka la bakla, namar kane kam dei ka kam jong u briew hynrei ka kam jong u Blei ha kaba hap ban pyndem ha ka mon u Blei ym ha ka mon u briew.

Dei na kane ka daw ong ka ktien u Blei “Ngan pyni buit ha pha ba phan thied na nga ia ka ksiar ba la phrang ha ka ding ba phan ioh man spah bad ia ka jainkup balieh ba phan ioh kup ialade bad ba kan ym paw ka jinglehrain jinglyngkhuit jong pha; bad ia ka jingsleh khmat ban kyllan ia ki khmat jong pha, ba phan iohi” Jingpynpaw 3:18. Ka mut ba u Blei u kwah ba ki briew baroh ne kita ki bangeit ba la khot ialade ki Khrtistan kin ioh tip ba kata ka Balang ba shisha dei kaba iaid lyngba ka ding ban phrang ia ki da ka jingiaishah bad jingkohnguh ha ka ktien u Blei bad ka jingialam u Mynsiem Bakhuid bad ym da ka jingialam ka jingstad ba kynja briew. Ym ban pynsngewbha ia ki briew hynrei ban pynsngewbha ia u Blei kein. Ka Balang ba shisha kam dei ban iaid da ka mon u paid kam dei ba long politics hynrei da ka jingduwai bad da ka ktien u Blei. To ong kumba ong u Apostol Paul – “Lada nga dang pynsngewbha ia ki briew, ngam shym long u shakri u Khrist” Galatia 1: 10. Amen.