“Lano u Jisu un synshar ia kane ka pyrthei?”

AIS Suja

U Jisu un synshar ia ka pyrthei. Don bun bah kiba kwah ban tip ia kata, don ruh ki bym kwah tip ne kim sngewdonkam ia ka. Hynrei ka jingshisha ka long ba ngim lah ban lait na ki kti jong u Blei bad ym lah lait na kata ka por ka jingsynshar jong u Jisu ia kane ka pyrthei.

Kumta ha shwa ba u Jisu un synshar, u Blei un ai lad shwa ba u soitan (Lucifer) un synshar shipor. Bad kata ka por ka long tang 1290 sngi; 1260 + 30 sngi = 1290 sngi. Daniel 9:27 / Daniel 12:11.

Ban long 1335 sngi pat, don ki 45 sngi ba kyrpang ba u Blei u la buh bad kata ka long ka por pynkhreh na ka bynta ka jingwan ka 1000 snem ka jingsynshar u Jisu Khrist. Na kata ka daw la ong ha u Daniel “Suk uta uba iai ap bad uba kot haduh 1335 sngi”. Daniel 12:12. Hapoh kita ki 45 sngi, kan long ka por jinglum lang ia ki Israel sha Lum Seion. Jeremaiah 31:10-12 / Isaiah 51:11. Kan long ruh ka por jinglumlang ia ki Jentil sha Lum Seion. Isaiah 66:18 ; 19:24-25. Mikah 7:10-17. Kan long ruh ka por ba u Jisu un tei pat ia u lum Seion namar ba u la pra. Sekharaiah 6:13 / Esekial 40:47. Bad kaba kongsan tam hapoh kine ki 45 sngi ne haba khein lang long 1335 sngi. Daniel 12:12, ka long ka por ka Jingpynsleh ia u Jisu Khrist ba un synshar ha kita ki 1000 snem. Daniel 9:24 / Daniel 7:11-14 / Loukas 1:31-33.
Mynta haba ka jingsynshar soitan ka la kut u Jisu pat un sdang ban synshar kein kumba la thoh ha ka Kitab u Daniel kaba ong – “Te ia kata ka Hima, bad ia ka jingsynshar, bad ia ka jingkhraw jong kita ki Hima hapoh ka bneng baroh, yn aiti noh ha ki briew jong kita ki Riewkhuid ki jong uba hakhlieh tam eh: Ka hima jong u ka long ka Hima bymjukut bad ki jingsynshar baroh, KIN SHAKRI KIN KOHNGUH IA U”. Daniel 7:27. U Jisu u long u Syiem ki Syiem.
Kumta hadien ba la dep pynsleh ia u Jisu ban long u Syiem. Daniel 9:24, la kem artad ia u soitan (Lucifer) bad khum ia u 1000 snem. Jingpynpaw 20:1-3. Bad hangta u Jisu un synshar bad bishar 1000 snem. Jingpynpaw 20:4. Bad ha ka por ka jingsynshar u Jisu hangne ha pyrthei, ka pyrthei (Earth) kan dap da ka jingtip ia u Trai. “Kin ym pynmynsaw lymne pynjot ha u lum ba kyntang jong nga baroh: Namar ka pyrthei kan dap da ka jingtip ia u Trai, kumba ki um ki tap lin ia ka duriaw” Isaiah 11:9. Balei ka long kumta? Namar ba ia u soitan la kem bad set byndi 1000 snem, te ym don nongthok nongshukor shuh.
Ka pyrthei kan ym long shuh kum ba long mynta lane kum ha ka por ba synshar u soitan Mrad khlaw kaba dap da ka pop bad jingjynjar suda.
Te iano u Jisu un synshar bad bishar? Ka ktien u Blei ka iathuh – Ba u Jisu un pyniakhlad ia uwei na uwei pat, kumba u Nongap langbrot u pyniakhlad IA KI LANGBROT NA KI BLANG. Ia ki langbrot sha ka Mon, ia ki blang sha ka Diang ……. To wan phi kiba la kyrkhu u Kpa” Mathaios 25:31-34. Ka mut, ia kiba pop bad kiba hok.
Ha ka por ba u Jisu un long u Syiem u Nong synshar ha pyrthei, kan don ka bneng bathymmai bad ka khyndew ba thymmai. U Isaiah u la dep iathuh lypa da ka ba ong – “Naba ha khmih, Ngan pyllong ia ki bneng ba thymmai bad ka khyndew ba thymmai: kiei kiei kiba mynshwa yn ym kynmaw shuh, lymne kin ym wan ha ka jingmut briew” Isaiah 65:17. Ha ka jingpynpaw pat la thoh “Bad nga la iohi ka Bneng bathymmai bad ka khyndew ba nyngkong KI LA LEIT NOH , ka duriaw kam don shuh” Jingpynpaw 21:1. Ka long kaba sngew phylla ba ka duriaw ruh kam don shuh ha kata ka por, wow ka bor jong u Blei!.
Ha ka por ba u Jisu un synshar ha pyrthei, uba dang 100 snem ka rta un dei u khynnah ne samla. Isaiah 65:20. Peit ka jingiapher mynta. Mynta 100 snem ka rta te ym long briew shuh bad kham niar ban kot ia kata ka rta. U Blei u la pynlyngkot shisha ia ki rta briew. “80 snem namar ba khlain eh” Salm 90:10.
Hapoh kata ka 1000 snem ka jingsynshar u Jisu Khrist, kan wan hiar ka Jerusalem bathymmai na bneng “Nga la iohi ka Nongbah bakhuid KA JERUSALEM BATHYMMAI ba ka wan hiar na u Blei na Bneng” Jingpynpaw 21:2. Ka Jerusalem Thymmai ka iapher na ka Jerusalem kaba don hangne ha pyrthei. Ka don 12 ki khyrdop bad 12 ki angel ……. Ka Nongbah ka dei ka ksiar ba nylla bad ki ha rukom ki mawkordor. Kam don Temple, kam donkam ia ka sngi ne u bnai, ia ki khyrdop jong ka ym ju khang, ki bymkhuid bad kiba ijli kim lah ban rung hangta. Jingpynpaw 21:9:27.
Hapoh 1000 snem kan don ka jingkhawai shongkurim u khunlangbrot. Mathaios 26:29. Hapoh ka 1000 snem kan don ka jinglehkmen jingshad kmen ha Jerusalem. Ong u Jisu – “Te ngan shad kmen ha Jerusalem” Isaiah 56:19.
Hadien ka jingsynshar u Jisu 1000 snem ha pyrthei, yn bret ia u soitan Lucifer sha dujok.”Te ia u soitan uba shukor la bret ha ka ba don uta u Mrad khlaw bad u nongiathuhlypa balamler, yn pynkordit ia ki mynsngi mynmiet shaduh ki bymjukut” Jingpypaw 20:10.
Tang shu bret ia u soitan sha ka pung ka ding kan wan kaba kut. “Ynda kumta, long kaba kut, ynda un (U Jisu) aiti noh pat ia ka Hima ha u Blei u Kpa, ynda u la pyndam noh ia ka jingsynshar baroh bad ia ka jingdonbor baroh, bad ia ka bor baroh” 1 Korinth 15:24-28.
U Jisu un ai ia ka bor synshar, ia ka jingdonbor bad ia ka Bor ha u Blei u kpa. Te shabar na kane ngim don jingtip shuh namar ka long na u Blei.
Tang kawei ngi tip ka long, ba u Blei un ialam noh ia kiba ieit jong u sha ka Bymjukut ka Lawei (eternity future), sha – “Kiei kiei ba ka khmat kam pat iohi, ka shkor kam pat iohsngew, bad kim shym la mih ruh ha ka dohnud u briew, ki long kita kiei kiei kein ia kiba u Blei ula buh lypa ia kita kiba ieit ia u” 1 Korinth 2:9. Namar kata – “To long phi kiba la pyniasuk bad u Blei” 2 Korinth 5:20. Ia suk noh bad u Blei da kaba iehnoh ia ki lynti bymman baroh, da kaba duwai kyrpad ha u. 2 Khronikl 7:14. Namar kita kiei kiei ki long hajan. Jingpynpaw 22:10.