LANO PAT??

P.B.S

U Ksan bad u Bhalang ki la iarap borbah ia la u kpa sha lum katba ka Syrpai ka iarap ha iing bad la ka km ie. Kumne kine ki shi iing ki pyntyllun ia la ki kam. Ka jingiatreilang hapdeng u Kpa, ka Kmie bad ki khun-heh ka pyntyllun stet ia ki kam iing bad ki kam sha lum.

Ka por tlang ka dei ka por ba ka sngi ka sep kloi khamtam ha ki bnai Nohprah bad Kyllalyngkot. Haba la dei ka sngi bam khana, kata ka 9 tarik uta u bnai, baroh ki khynnah skul ki la kmen namar ki ioh ban ialehkai sngewbha katba ki mon bad ha kajuh ka por pat ka long ka jingkyndeh shadem la kin sah klas ne kiew klas. Ki khynnah shynrang ki muja ha ka ialehkai phutbol ha madan skul katba ki kynthei pat ki ia risa kynhoi ha ka jingialeh mawpoin ha kawei pat ka madan rit ha syndah ka madan phutbol.

Na ka bynta ban shet sha shet ja la khot iarap ia ki katto katne ngut ki kmie ki khynnah skul. La ai sna sngi ha ka por 1 baje nohphai sngi da ka jadoh khlein sniang bad ki khynnah ki la iabam pyrkhing kpoh ba ka bang eh.
Ynda ki la dep dihsha sngi ki la leit ialehkai biang sha madan. Ba dang kdang eh ki shu iashongkai iathuhkhana shwa bad hadien katto katne pat ki la pynbeit ban ialehkai mawpoin bad ki kynthei. La shitom ban jop pyrshah ia ki shynrang namar ki kham khlain bor bad shalak palat. La katta ruh kim don jingsngew eh namar ka dei tang ka jingialehkai sngewtynnad ym dei kaba iathong. Katba kine ki khynnah ki dang muja ka ialehkai mawpoin, ki nongshet ki la bunkam ha kaba ot jhur, khleh jhur, ban pynbiang ia ki ja ka jyntah ha la ka jong ka jong ka dabor, ka pliang bamja bad kiwei kiwei de ki jingdonkam.

Haba la dep pynbiang nadong shadong, bad ka por ruh ka la dap 5 duna shipowa, u Headmaster u la pyrta da ka tynghung ia ki khynnah skul ban wan noh ban sdang noh ka jingbam ja. La dwai shwa ban bam da uwei u nonghikai ba kham rangbah tam ha kata ka skul. Ynda la dep bam ki khynnah baroh, ki nonghikai bad ki nongshet ki la ia bam ryngkat. Ka por ka la dap 7:30 mynmiet, u Head ha ryngkat bad ki nonghikai ki la nang pynkhreh ban sdang noh sa ka jingiashad ki khynnah skul kat kiba kwah shad. Shiteng kynta la iaid ka por ki nongshet ki la dep sait dep khlieng bad ki la shim ia la ki tapmoh syaid ban shong syaid ding shwa ha ka ding ha rhem bha da u rnga ba la pynlang na lai mawbyrsiew
Haba la dap 8 baje thik, la sdang ia ka program. Don kumba 15 ngut ki khynnah ki ban shad. Don kiba shad da ka jingrwai Khasi, jingrwai phareng bad jingrwai Hindi. Tang shu mar iasdang, la shongshit hir da ka jingthapkti, iaroh, risa kynhoi da ki nongpeit kai kiba la dap smam ka phyllaw iingskul. Haba shad u Okin, u Lurstep, u Lamphang ki paidbah kim lah khlem da siaw jam namar ka jingtbit jong ki.

La lut ki nongshad bad ka por ruh ka la miet, kata 11 baje lah lah. Shwa ban pynwai, u Headmaster u la kyrpad ia baroh kynthup lang ia ki nongpeitkai ba kin ia rwai lang ia kato ka jingrwai kaba ong “Ri Khasi Ri Khasi Nga ieit ia Pha”. Tang shu wai baroh ki la leit noh sha la ki iing ki sem da ka mynsiem kaba kmen.

Ha ka sngi kaba bud pat, la pynlong ia ka jingsam resol ha ka por 10 baje mynstep. Baroh ki khynnah skul ki la wan lut kumba la bthah da ka bor skul. Ha ka klas V la long nyngkong da ka Naphibiang na ki 40 ngut, na ka klas VI la long nyngkong da ka Sadalin na ki 35 ngut, bad na ka klas VII la long nyngkong da u Ksan na ki 30 ngut. La pynlong ka jingiathapkti kaba jam bha na baroh ki khynnah skul. Shwa ban pynbna shuti, la ioh ka jingsneng jingkraw na u Head jong ka skul. La pynbna ba ka skul kan plie biang ha ka 20 tarik Rymphang ha ka snem ban wan. Baroh ki la pass lut bad don ruh kiba la shu pynpas. [yn dang bteng]