P.B.S
[ba bteng] “Nga sngewshngain phi kong ba phi la wan sah lang shane sha sor. Haba ngi sah jan ngi lah ban iabeh ha ka pang ka shitom bad kino kino ki jingeh. Ngam kloi pyrkhat ba u Bhalang un lah ban leh haduh katne. U ruh u la biang ka por ban wad noh ia la ka nongsumar” la ai jingmut u Kni.
“Ka dei kein hep” la mynjur ka hynmen.
Ba la kham heh ka Syrpai bad ka la shalak ka dukan ka la shngain. Ka la nang lut ban pyniaid nadong shadong. U Bhalang ruh u la sngewhun ba u la pynurlong ia la ka jingthmu. U sngew shaniah ban aiti ia ka dukan ha la ka para bad ki kmie ki kpa ki la im suk im sain ha ki ar jingmih na dukan bad na iingwai.
“Mei, Pa nga ruh nga dei ban pyrkhat noh ialade ia la ka iing ka sem” u la pynpaw ha khmat jong ki.
Ka dei kein khun. Ngi ruh ngi la pyrkhat kumta ban shu bat sah ka long kumba leh bein ia me” la ong ka kmie.
Hadien 3 snem u Bhalang u la shong kurim ia kawei ka thei samla ba stem sniehdoh bad ba lyngkot. Ka dei na Mawprem. Ka trei ha kawei ka Private Company. Ka kyrteng jong ka ka dei ka Sandra. Ki don tang 2 ngut shipara bad tang para kynthei. Ka dei ka hynmen. Ka kmie ka la jan shongthait na ka skul sorkar bad u kpa u dei u Head misteri.
Ki la shongsuk shongsain bad ioh khun 4 ngut 3 kynthei bad uwei u shynrang. Ki la shongwai shipor bad hadien ki sah noh ha iing lajong sha Mawlai Mawtawar. Ha kata ka shnong u la buh iwei i dukan rit bad u la thmu ban pynheh hadien habud.
“Ka jaitbynriew jong ngi ka dei ban kyndit thiah ban hikai bad pynshlur ia ki kam lajong. Lada u dkhar u klien uba wan na jngai u im ja balei ma ngi pat hangne haba dei la ka muluk lajong. Katto nga la pyniaid kam hok ka dukan nga sngewthuh ba ka kam lajong ka long kaba kordor bad kaba donburom. Ngi lah ban leh katba ngi sngewbit. Ka jingioh ha ka kti lajong ym don nong korbar ngi long laitluid beit. Haba ngi mutdur lypa bad iai im sngi ban pyrkhat khlem pep ka jingthmu ngin poi sha ka thong. Ka jingaimynsiem ka dei kawei kaba pynshlur ia u briew. Wat pyrkhat ia ka jingbymlah, pyrkhat ia kaba lah. Ngam mutdur ban long ban man kumne hynrei ka jingiaishah bad ka thong jong nga ka la seisoh. Ban shu ong ka dei ka nusip kam iahap ha ki riewpyrkhat hynrei ka nusip ka don hi la ka kylla. Lada shu pynshong nongrim ha ka nusip ka long kumba pyntroin ia ka bor pyrkhat. Ngan pyrshang ban hikai ia ki khun kumba nga la iaid lynti” la ong u Bhalang ha la ka lok.
“Ki jingshem jong phi bad jong nga ki iapher te hynrei kita kiba shem jingeh ki kham sngewthuh ban ia ngi kiba shu ia kyrsum ha ka jingpahuh pahai” la pynphai ktien ka Sandra.
“Ia ka ding lah ban shna bun jait, kumjuh ruh u briew u lah ban kylla ha ki bun ki rukom” la kren siat pharshi u Bhalang.
“U briew u dei ujuh la u dkhar, u phareng ne Khasi hynrei dei ka jingiapher ha ka rukom pyrkhat ba ujuh u briew u long uba riewspah bad ujuh u briew u dei uba duk. Toi, ngi don kijuh ki dkhot met” la ban biang u Bhalang.
“Sandra, phi bad nga ngin buh ka thong ban tei ia ka longiing ha ka nongrim kaba skhem ha baroh ki liang. La ka longiing longsem, la ka Ri, la ka jaitbynriew lada kam tei skhem ha kaba sdang ‘LANO PAT’ kan tei – kane ka kynthup wat ia ki kam ki jam, jingtrei jingktah bad longbriew manbriew hi.
La kut.
Phi don ban ong eiei?