LANO PAT???

P.B.S

[ba bteng] Katno kilometer ko ka jingjngai nangne shaduh khohramhah?” la kylli kwah tip ka kmie ki khun.
“Tharai la kumno-kumno ka don beit hapoh ka 68 Km” la antad u kpa.
“Pdiang shuh ka ja kpa” la ong ka menkmie.

“Ow! pdiang shuh kumno haba la khad arsien” la pynphai ktien u kpa.
“Tip seh i kumba phim pat kdang ba phi khur shi khur ia ka sapit sohkhawja” la ong ka menkmie da ka wiat rymmiun.
“Dei ba la mutdur eh sha Sohra shu neh ban shong hajuh” la ong u kpa da kaba rkhie.
Ka kmie, ki khun bad u Bhalang ki la kmen eh ban ioh leitkai sha ki thain Sohra kaba la bna nam ym tang ha India wat ha pyrthei ruh ia ka jingitynnad jong ka.
Ka Daplang ka la dep ialeh Selection Test ha ka matrik bad ka la pass. Ka Labiang bad u Bankerlang ki la dep ialeh egsam tangba kim pat ioh resol. Baroh arngut kin ioh resol ha ka 13th December. Tang shu mih u bnai December (Nohprah) ki la shongshit kata ka leit piknik sha Sohra. Ka Daplang ka iai pynkynmaw bym dei ban klet rah Kamera (Digital Camera) khnang ban shon dur sah jingkynmaw.

Ka kynta ka iaid khuk khak bad ka shi sngi ka kut kloi long kumba ngi plied ia ka kot pule kawei ka sla hadien kawei pat. Kumta ruh ka sngi ai resol ka la dei bad baroh arngut ki ia pas. Ka Labiang ka long Balai bad u Banker u shu pas sobjek khlem ioh position. Ka jingpas jong ki khun ka la pynkmen ia ki kmie ki kpa kiba la pynlut spah pynlut hajar. Ka Labiang ka iathuh ba ka skul kan plie pat ha ka 14 tarik u nai Rymphang ha u snem ban wan.

U Kpa ula pynbeit ban leit sha Sohra ha ka 18 tarik u Nohprah kaba dei ka sngi shuti. Ha ka janmiet 17 tarik u Bhalang, ka Daplang ki la leit iew ban thied doh ban song ja sha Sohra. Ki la thied da ka dohsniang, dohsyiar bad katto katne jait ki jhur. La ia shongshit kata ka jingleit kai Sohra. Ki la sei ki riam itynnat ban phong. U bah Sokon u la riam kumto kumba ju riam haba leit jingleit. Ka kmie ka sem arliang katba ki khun pat ki riam kum kito kiba shait riam ki khynnah sor – kata ka patlun Jeans, Jaket, Kanbas bad ka pan khyllong itynnad ia u shniuh. U Bhalang u phong da ka patlun Jeans, ka Jaket rong marun bad ka juti action. U Banker ruh u phong kumta tang iapher tang ka rong ka jaket namar u phong da kaba saw.
Ka maruti car rong jngum ka la wan ha khmat ked (gate). U Bhalang u la rah ia ka pla ba thep ja ba la song ha ki khiew kumba 2 tylli eiei bad ki bitor thep umshit, jhur sdieh, jhur im. Ki la rah ka kotkhubor rim ban siang bamja. Ka Daplang ka la rah ia ka kamera remdor. U Kni bad u bah Sokon ki la shong ha khmat bad u draibar katba kita saw ngut ki shong hadien. Ka kali ka la mih ha ka por 7 baje thik. Ba ka dei dang step ka surok ka kylluid war-war bad u draibar u la suh beit wia ia ka kali.

Ki la poi ha Khohramhah ha ka por 9:30 mynstep. Ki peitkai tang shiphang bad ka shondur artat kumba 4 tylli ei ei. Jait ba dang kham step ki la sngewdei ban bamja pat ha Thangkharang Park kaba jngai tang 7 minit ei ei nangta. Ynda la poi ha Park. Ki la jied ka jaka ba kham kyndong ban bamja. La shondur sah jingkynmaw. Nangta na Park ki la kiew ter-ter tang shiteng shiteng kynta man la ki tourist spot bad ki la pynkut ha Mattilang Park. Ki poi iing ha ka por 7 duna ei ei. Ha ka sngi babud la pynsait noh ia ki dur ha Narayan Studio. [yn dang bteng]