LANO PAT

P.B.S

[ba bteng] “I mama im don ne?” u la kylli na ka Nia
“Em, i leit jingleit sha ki thain Upper Shillong” la iathuh ka Nia.
“Shibit ngin sa ia leit iew bad nga mo kumto hadien ba la dep dihsha” la ong ka Nia bad ka dang pule kot khubor artat
“Katba phi ong Nia” la ong u Bhalang.

Katba ym pat dei ka por leit, u Bhalang u la sait shwa ia ki jainphong kiba u phong sha shnong. U sait ia ki muja, juti action rong blue, ki banian, ki soptilor bad ka jaket stang rongiong. Ynda la dep, u la pule myllen ia ka kot khubor bad u shu iohthiah jlang. Haba la jan dei ka por leit, ka Nia jong u ka la kyrsiew ia u bad theh sha lang. Ka pyrkhat ba u iohthiah dei namar ba u la shong kali jngai. Tang shu dep dihsha, ka Nia ka nang khreh ia ka pla iew kaba heh ar tylli bad u Bhalang pat u dang khylliap kwai katto katne kyntien.

Ki la wan na iew ha ka por 5:30 janmiet. Katba ki dang ia bunkam ka shet ka tiew, ka ot doh, la wan sa u bah Sokon na ka jingwan donkam.
La ioh jingtip ba la mih ka resol klas XI. U Kni u la phah leit mih ia u Bhalang sha skul. Haba u la leit ha ka sngi kaba bud, ka dei shisha kumba la bna. U Principal u la khot ia u Bhalang sha kamra. U Bhalang u la tieng tip na kaei ka daw. Haba u rung ha kamra u Principal, u la khublei ia u. U Principal u iathuh ba haba la khein ia ka persenteij u ioh haduh 71%. U la kyntu ia u Bhalang ba un trei bad nang iai trei shitom khnang ba un ioh Merit list. U Principal u la kylli ia u Bhalang ba u sah haei bad dei shnong naei. U la iathuh kumba la kwah da u Principal. Kane ka jingshahkhot kyrpang u Bhalang ka la pynlyngngoh ia ki para klas jong u. Baroh ki la kwah tip ia ka daw. Lada u Bhalang um iathuh makna ruh hynrei la bna haw ba u Bhalang u ioh ia ka persenteij kaba heh bha.
U bah Sokon u la ai ia ka pisa bai rung klas u Bhalang kaba um duna ia ka T9000/- tyngka. U Bhalang u la shim phom bad pyndep syndon bad siew noh artat ia ka bai rung na ka bynta ka klas XII.

U bah Sokon watla u ieid ia la u pyrsa hynrei u hap pat ban pyrkhat sa na ka bynta la ki khun lajong. Kaba nyngkong, kaba kyrteng Daplang ka la shong klas X, kaba ar pat kaba kyrteng Labiang ka shong klas VIII bad u shynrang uba dei uba khatduh u la shong klas VI. U la pyrkhat khia bha kumno un leh. Hynrei u la sngewhun pat ka mynsiem namar u la dep lypa bad la ka hynmen ba lada ka long kaba lah un thawlad noh ban thep kam lada iarap ki ophisar jong u.
Ka jingshim klas na ka bynta ki klas XII ka ka iaid shaid shaid. U Bhalang u leit tista bha sha skul bad u da burom bha eh ia ki nonghikai, u mama bad ka Nia, nangta ka kmie bad u kpa jong u ki la long kum ka dawai khlain ia u briew uba shoh tlot bad ruh kumba ai sboh ia u jingthung.
Dei ha kawei ka miet ha ka aiom synrai kumno-re-kumno ka wan ka jingpyrkhat thymmai ha ka jingim ba la shu shaniah tylli ha kiwei bad kata ka jingpyrkhat ka la long kaba khlem pyrkhat hynrei kaba shu wan kynsan ha ka mynsiem u Bhalang. U pyrkhat kumne- “Nga la sah ha iing i mama la jan dap 5 snem. Nga kwah ba lada nga mih nangne ngan mih khlem jingthohdak sniew bad ba kan iai sah ka jingiabha jong ka iing jong nga bad ka iing i mama. Ngan trei shitom tyngeh ban pas bha bad ban kot ha ka Merit List. Tang shu ioh kam ngan sah noh la ka jong bad la ki para ban ia kyrshan lem ia ki. Lada nga don kata ka bor ban iohi ia ka lawei katno nga kmen hynrei u Blei uba stad u buhrieh noh na ki briew ia kata ka bor. Katne nga la sah bad ki hynrei khlem pat mih ktien wat tang shisien ruh. [yn dang bteng]