LANO PAT???

[ba bteng] Hynrei ia kata baroh nga ieh ha ka jingpyniaid u Blei. Ka jaitbynriew Khasi ka dei kaba rit paid eh, te lada ka iaid ha ka jinghikai ba kynja briew, khlem pep kan shu jah rngai wat tang sa shi pateng bynriew” la kren kynthoh ka hynmen.

“To, kong nga la sngewthuh. Te, ka resol kam slem shuh tharai sa tang 2 ne 3 sngi ka la mih” la ong u bah Sokon.
“Nga kitbok ba un pas bad un bteng la ka jingpule katba phi dang lah kyrshan. Nga sngewthuh phi ruh phi khia ka jingkit ha iing khamtam haba ki la leit skul lut” la ong ka hynmen bad ka la tan ia u shangkwai ban khoh kwai biang.
Haba la ih ka ja ka jyntah ki la ia bamja lang khrui. Ynda la dep bam, kita ki khun rit ki la leit thiah noh bad ma ki pat ki dang shongkai shwa katno katne por. Tang hapoh 10 baje ki la leit thiah noh.

Dang step phyrngap ka kmie ka la khie thiah bad ka la kyrsiew noh ia ka Syrpai. Kumta baroh ki la ia khie dang kham step ha kata ka sngi leit u Kni bad u Bhalang.
Ka Syrpai ka la pynthep katto katne ki jhur thung ba thung hi ban rah u Kni sha Sor. U Kni bad u Bhalang ki la dep khreh bad kaba sah sa tang ba kin dihsha. Tang shu dep dihsha kita ki pyrsa rit ki la doh ia la u hynmen bad la u Kni. Ka kmie u Ksan ka la ai iarap pisa T4000 tyngka ia la u para tang kum ka dak ka jingiarap bai klas ia u khun. Ia u Bhalang pat ka ai thep pla T200 tyngka. Ki la leit on ia ki haduh steshon. Ka bos ka la mih ha ka por 6 baje thik.
Ki la poi iing ha ka por 11 duna 5 minit. U bah Sokon u la leit donkam sha opis ban iakynduh ia ki enjiniar kiba iadei kam bad u.

Ka dei ha ka 11 tarik u Jylliew ba la mih ka resol matrik, kata hadien 4 sngi ka jingwan shnong u Bhalang. Da ka jingkwah tip bad ka jingtied u moina (dohnud) tuk-tuk ha shadem, u Bhalang u la kwah eh ban tip u poi ha dibishon aiu. Haba u la ioh ia ka kot khubor kumba ha ka 8:30 ei ei u la peit pynstet bad da ka jingkmen u la lap ba u poi ha ka First Div. u doh ia la u kni, ka Nia, ki khun jong ka baroh. Ban pyneh daw ia la u pyrsa, u Kni jong u u la phah shet jadoh bang bad ia bamja tang para ma ki.
La iathuh sha iing kmie u Bhalang ia ka jingpas bha jong u. Ka la long ka jingkmen kaba khraw ia ka iing ka sem jong u Bhalang kat kata ka jingpas donburom jong u ha kaba un dei ma u uba nyngkong eh na kata ka shnong ban pas ha ka kyrdan First Div. Ka kmie kam sngew hun ban shu kmen tang hajngai hajngai hynrei ka da kwah wan jngoh ia la u khun. Te hadien shisngi ba ka ioh khubor ka la leit sha Sor bad ka da lam lang ia ka Syrpai. Ba ka shnong ka long kaba jngai ki la poi kumto 11 baje ei ei.
Ki sah tang shi miet. Ha kata ka miet ka la ioh ban shongkai slem bad ka hep kynsi bad kumjuh ia la u para. U Bhalang u da kmen eh ba ka wan ka kmie namar haba wan ka kmie ne u kpa, ka pynshongkhia bad pynkhlain ia ka jingsngewjan hapdeng jong ki.

Kum ka kmie kaba pun ba kha bad kaba pynheh pynsan ka sneng ka kraw ia u hakhmat ka Nia bad u Mama ba un kohnguh bad shah ha ka jingialam jong ki. Ka da pyntieng ruh ba tang shu tip khubor ba u saitlah ia la ka Nia bad u Mama kan phah wan noh sha shnong. Ka la mih na iing u para ha ka por 12 duna ban leit phai noh sha shnong.
Haba la leit ka kmie, u Bhalang u sngewkynjah hynrei u kynmaw dngong ia kaei kaba ka kmie ka ong. U tieng thot-thot bad u rai ha la ka mynsiem ba dei ban sngap haba u iohi lei lei ba ka kmie bad u mama ki sngewthuh jingmut. [yn dang bteng]