LANO PAT???

P.B.S

[ba bteng] LYNNONG- 7
La iaid ki sngi la iaid ki taiew bad ym lap ba sngewthuh ba u bnai Jylliew u la mih. U bnai Jylliew u dei u bnai uba ki khynnah ialeh matrik ki thikna ba ka resol kan mih. Kito kiba la ialeh bha kim khuslai bad ki da kwah eh toi pynban ba kan mih noh ka resol. Kito pat ki bym da leh bha ki shu ap ia ka jingleh synnei u Blei ba kin pas. Na ka bynta u Bhalang, une um da i khia jingmut namar ka jingkyrmen ka don beit ba un pas.

La bna bad la thoh ha baroh ki kotkhubor ba ka resol ka la mih hapoh ka 12 tarik uta u bnai.
Shwa ban dap 10 baje mynmiet la wan ka Telephon na shnong ba phun ka hynmen. U bah Sokon u la shim pynstet da ka jingkyndit.
“Hep, nga pyntip sha phi ba ito i kong Sbai i la khlad bad yn tep pat la shi sngi. Da phi lait te ka bha ba phin wan namar ki la phah pyntip ia nga. Kawei ruh ka dei ka iing kaba phi ju leit shongkai man ba phi wan shnong. Nga kwah ba phin ia wan ialam lang ruh ia u Bhalang jait ba phi la wan shane. Ngi sngewkynjah bad ki para jong u kim ju klet ban kylli ia u. Ngan buh noh ho” la ong ka hynmen.
U bah Sokon u la pyrkhat kumno yn leh haba ka sngi tep ka dei ka sngi nyngkong. Ka kali ruh shitom ban ioh lait sa tang lada phah buh da ki Taxi na Myriaw. U la rai ban leit pat dang step ha ka sngi nyngkong. U la ialam lang ia u Bhalang kumba la kwah ka kmie. Ki la poi ha Myriaw ha ka por 10:30 mynstep. Nangto pat u shu phah buh da ka taxi shnong. Ki la poi ha shnong ha ka por 11:30 mynstep.
Tang shu hiar na kali beit beit ki leit sha iing. Ki bam ja shwa ha iing ka hynmen. Da la dep bamja u leit noh sha iing ka nongiap. Bun ki para rangbah ba ryngkat rta bad u ki la khublei ieit ia u kum u para shnong bad kum u para khynnah ha ki por mynshwa.

“I pang kumno?” u la kylli u bah Sokon ha uwei u rangbah.
“I shait ud bym khlain ha kine ki bnai ba la dep. Hynrei ha ka janmiet sngi thohdieng i ioh pang prie bad pynhiar. La leit shim dawai hynrei khlem iarap. Te, imat, ba ka la neh 2 sngi duna, kumta ha ka step sngi saitjain kumto ha ka por 8 baje ei-ei mynstep i la khlad noh” la ithuh uta u rangbah.
“Ki khun ki dang shongiing ne la mih iing lut” u la bniah biang.
“Baroh ki la mih iing lut bad ki la ioh ksiew ruh na ki arngut ki khun kynthei bad ki khun shynrang ruh” u la iathuh bad kner ia u plastik kwai ban bam kwai.
“Phi pat phi wan tang marwei ne badno?” la kylli kylliang uta u rangbah.
“Nga wan tang ma nga bad uto u pyrsa. Nga mih dangstep na iing bad poi ha Myriaw ha ka por 10:30. Nangta pat nga wad kali hynrei nga ioh pynban da ka kali shnong. shu donbok hynrei shane te jynjar mo” la ong u bah Sokon.
“Ngi lah kham suk mynta khyndiat ba la don kato ka kali shnong. Ka surok te khohruh khohram tangba shu poi la ka poi hi. Uto khynnah draibar u ud palat ia ka jingsniew palat surok ba ka ktah ia ka kali” la ong uto u rangbah.
“Katno u shim bai kali?” la kylli kwah tip u bah Sokon.
“U shim 60 marwei. Da reseb pat u shait shim kumto T500 mynsngi bad T700 mynmiet” la ong uta u briew.
“Ia nga ruh myne u shim T500. Tangba nga iohsngew um kren ktien shnong jong ngi. U dei tang u shongkha ne?” la buh jingkylli u bah Sokon. [yn dang bteng]