P.B.S
[ba bteng] “Ka dei ka burom kaba khraw lada ngi trei la ka kam lajong khamtam lei lei lada ngi lah ban pynroi ia ka man la ka por. Te ka jingkylli ka long hato ngi lah ban ieng marwei? Ka jubab ka long ‘em’ ia kiba bun bad hoid tang iwei ne arngut eh. Phim lah lait na ka Bank, Agency, lada phi kwah ban kyntiew ia la ka kam. Hynrei kawei kaba nga kwah ban pashat jingmut ha phi ka long ba phi dei ban seng da ka kynja sosaiti (Society). Kane ka dei ka lynti kaba bha eh. Tangba ban seng ia kane ka sosaiti ka donkam eh ia ka jingsngewthuh jingmut, ka jingiatylli bad ka jingthikna ka rukom treikam. Lymda kumta kan khyllem kumba khyllem ka kynroh Jerikho.
Kumba kren noh khyndiat ia kane ka jaitbynriew jong ngi, ka pynshitom jingmut shibun eh ban kyrsiew thiah ia kane ka jaitbynriew jong ngi. Ngi phong bun jait ki uniphom na kata ka daw ka kylla bun rong la kum uto u chameleon. Ka jingbymia sngewthuh, ka jingiapait bad ka jingkwah laitluid palat ki dei ki daw tynrai. Dei ban pynkhiah naduh tynrai shwa. Lada ai da ka bih kin shu iap lut hynrei dei ban shu riam ba lada ngat iwei kiwei kin ithuh ne pei shkor. Kane ka jinglong mangkariang ka pyntieng wat ia kito kiba heh spah kiba don jingmut ne mynsiem ia kane ka jaitbynriew tham.
Ka jingdon ka sosaiti ka pyllait na ka jingshim kabu ki bank, ki nongairam. Ka sosaiti ka airam ia ki nongrep, nongdie dukan rit, nongtrei kam lajong ha ka sut kaba jem shibun. Haba ki siew hok bad ki pyndonkam hok ka long kum ka tanki (tankey) um kaba lah ban ai um sha kiba bun ki longiing kiba treikam lajong. Ka ri Germany ka dei ka ri kaba bet ia une u symbai bad la pynbud da kiwei pat ter ter haduh kine ki por jong ngi mynta” khublei shibun u la pynkut.
Ka dei ka pali sa u nongkren uba lai ban ieng. Une ruh u dei uba deng iitkhmat iong tangba uba lieh bad lyngkhot.
“Nga ai khublei ia u shongknor bad kumjuh ruh ia phi ki paidbah jong ka shnong. La pynbeit ia ngi ba ngin kren ha la ka jong ka jong ka bynta. Ka Ri Khasi-Jaintia jong ngi ka dei kaba la kyrkhu kyrpang da u Blei. Phai kat shaba phai iohi tang ia ka lynti jingkyrkhu – peit u dewiong, u mawshun, u shyiap, ki kynbat dawai, u mawshynrut, ka rep ka riang kaba bha ha la ki thain ki thain – Bhoi, War, Khynriam, Pnar. Ki wahbah wahrit byllai byllien, ki jaka jngohkai kiba pynjem thait ki don kyrhai khamtam ha ki thain Sohra. Sha thain War Pynursla ruh ki don tangba yn leh kumno khlem pat poi surok. Khlem sngewlah ngeit ba tang namar ka jingdon ki kshaid, ki wah, ki riat, ki pung, umshit, kan long kum ka jingkyrkhu ba na sha lyndet. Kine ki dei ki jaka kiba ngi lah ban thaw pisa ha ryngkat lang ka jingtreilang ki bor sorkar. Ka ri jong ngi ka don sha kyndong eh ka India hynrei baroh ka pyrthei ka tip lut ia ka jingitynnad jong kane ka jaka. Shim ia kane ka kabu lada don kano kano ka jaka itynnad ha shnong ne ha thain jong phi. Iasyllok bad ia mir jingmut ban shna ia kata kaba ki ong ka ‘Tourist spot’. Ka jingmih na ka jylla jong ngi ka long kaba rit kam da dei eh kaba palat kumba long sha Ri-thor. Ki jingmih barit kum u phan, sohniamtra, sohkwit, sohmanir, shynrai bad kiwei kiwei de la shu pynsepei da kaba die tad dor ha u dkhar. Baroh ki ia bam chip, hynrei kim ju pyrkhat ba tang uwei u phan la die T5 tyngka ne T10 tyngka. Jin da dei ba thaw noh da ka karkhana rit ban shna hi ka la long ka jingkyrkhu ia ngi. Peit shuh shuh ia kito ki kha-lyer kiba die uto u dkhar ha ka dor T30 ne T50 tyngka. Tang shu ai tiak da u pin la shu sep ei ka lut T30 ne T50. Ha kaba pynkut, ngi dei ban long kum ki dkhiew – ka jingiatreilang ka wanrah ka jingjop. Khublei shibun. [yn dang bteng]
Phi don ban ong eiei?