LANO PAT???

P.B.S

[ba bteng] “Ia noh Bhalang ngin leit sha stan Taxi Mawlai. Peit ka por la jan don 6 baje” la ong u Kni.
Tang shu poi ha stan ki la ioh Taxi noh hi. Tang hapoh shiphew minit ki la poi ha iing. U Bhalang u la leit sha la kamra ban bujli jain namar ba la jhieh lut.

Ki la ia bamja miet ha ka por 8:30. Katba dang bamja u Bhalang u la pur khana hapdeng jong ki ba u shah kynhied ha u dkhar ha Iewduh tang namar ba u rieh slap. Kita ki khun kynthei u Kni ki la samrkhie bad ka sngew synei ia la u bakha uba na nongkyndong.
“Kumta seh! balei bym da kynhied markylliang sa ka dkhar ruh kaba shong ha jaka ki briew ruh ka ak baheh” la ong ka Nia.

“Tip seh, haba i mama im don lang bad nga te. Ma i i leit rieh shawei nga pat hangta” la iathuh u Bhalang.
“Ka la ima hi ka jingbun ka dukan dkhar ha Iewduh. Haba shu peit tharai 3 powa u dei u dkhar bad u jong ngi pat tang shi powa. Imat ka don ka daw. Kumno un shu ioh rung suk haba um dei u trai muluk. Kane te imat ka la don ka jingpei nangno-re-nangno. Tip ka lah ban long ruh ba u dei uba ioh pisa ban ai boina (advance) ioh ki jong ngi pat kim don. Imat la dei ban don mano mano ban wad ia ka daw tynrai” la kren ba tip ka Nia.
“Ban kren ia u Khasi jong ngi te kmie bun hi ki daw. Ka jingduk, ka jingbieit, ka leh suk, jingbym don nongialam lynti, ka jingbishni, ka jingbym iatylli, ka jingbym lah shah, ka jingbym pyndem bad ka jingbym iohi jngai khamtam na ka liang ki heh spah haba la bun than tang ka sha lade.
“Oh kumno kumta kata ka ja ka shu lut la ka lut na pliang. Imat ba la bang eh ka khana dkhar” la ong u Bhalang.
“Shaid ki la iarkhie ba la sngew dei eh ka jingong jong u bad ka sngew sammut.

“To bteng biang se kpa sngew shoh khana bha mynta ka miet. Ngam ju kynmaw ba ngin ia pur khana kumne ia la ka jaidbynriew Khasi” la ong ka kmie kaba dang khat umshit biang ha la ka pliang.
“To ap ngan sa bteng ynda la dep bamja ioh her sa u khiewja te la kulmar thlim” la ong bad kren biria u menkpa bad ka rkhie.
Ynda ki la dep bamja bad dep lum dep lang baroh ki la iashongkai lang ha kamra pdeng. U kpa u la shong ha shuki thri, ka kmie ha shuki dieng ki khun pat ki shong ha mula nar bad mula plastic.
“Katba nga nang iathuhkhana phi nang pynkhylliap kwai kumba 30 kyntien ba ngan rah lashai” la ong u kpa.

“Phi i ka long kumne. Nga ngam pat da heh kyrdan hynrei nga shu iohsngew na ki ophisar jong nga bad na ki kattio katne ngut ki paralok kontraktor kiba la kham don kyrdan. Kaba da jynjar haduh katta katta ban pynsngewthuh ia ngi ki jaidbynriew Khasi namar la shongkulai eh ka jingbishni. Ka jingiatylli ruh kam don, ka jingburom ia ki nongialam ruh kam don, uba stad suda uba tip lut suda. Ban ia pyrkhat ia kaei kaei ruh kaba mih ka long tang ka jingmutdur rngai hynrei khlem lah pynurlong. Ka daw ka long ba ngi ngim iapher na u prew ne ka umsaw ne u khiew aluminuim, kaba mut khluit/shongshit kloi bad dait thah kloi. Te kum ia kita la tasam masam. Kaba sah ka dei sa tang ka ud bad ka jingnang ud kaba la palat. Phi shait iohsngew ba ki ong ym donkam um donjam. Katba u dkhar u klieng da ki hajar kilo meter ruh u wan shane ba u iohi ia ka lynti ka pisa”.
Nangta peit shuh shuh, peit kito ki dkhar kiba ieng da u lain ha ha Iewmawlong, hapdeng surok, hapoh khrum kali … [yn dang bteng]