LANO PAT

PBS
[ba bteng] Kane ka wah ka neh um baroh shisnem. Na ka bynta ban jingbhalang bad jingmyntoi lang, ka shnong ka la adong bym bit ban pom dieng ha shi lynter kane ka phud wah, ban bret jakhlia, ban khlong maw bad kumta ter ter.

Lai powa na ki nongshong shnong ki dei kiba duk bad tang shi powa ki dei kiba kham bit kham biang. Ki don ka jingiaieid, jingiasngewtynnad shi shnong shi thaw. Wat kito kiba la kiew sha sor ruh ki ju pyrshang thaw lad thaw buit ban kyntiew ia la ka shnong ban ia ryngkat lang bad kiwei pat ki shnong kiba la kham iaid shakhmat.

Kine ki shi para ki leit skul ha shnong kaba don tang haduh class VII. U Ksan, u Bhalang bad kawei ka para kynthei ki la leit pule ha ka skul sngi (M.E. school). U Ksan u shong klass VII, u Bhalang klas VI bad ka para klas V. Ki para ba dang rit pat ki dang pule ha skul step.

“Kpa, ynda la pass u Ksan nangne na shong ngin ym phah skul shuh ia u namar ngim kot bor ban phah sha Nongstoin ne sha Shillong” ka ong ka kmie.
“Kata kein kmie, nga ruh nga dang pyrkhat bad kan jin da la bha shibun lada u Ksan un kyrshan lang noh ha iing ha sem. Ngin pynsngewthuh biang por ia u mynta ba dang dei ka aiom lyiur ba un nym kyndit bapli u khun” la ong u kpa da ka sur ba lam sngewsynei.

“Kaba dei eh ka jingpyrkhat jong phi. Ngin pynsngewthuh jai khnang ba kan nym ktah ia u bapli u khun. Ki nonghikai ki ju iaroh ia ka jingstad jong u khamtam ha ka jingkhein” la ban ktien ka kmie bad ka khmat kaba i diaw.
“Katba dang ai lad u slap kumne ynda nga la dep dihsha, ngan leit khar lut noh kito ki dieng pria ha lum bad sa phah ia kito ki arngut ki shynrang ban da wanrah artat kato ka ratap ba ngan buh ha sem dieng ho” la bthah u menkpa ha la ka lok.

“To, kpa kin tang shu wan skul bad dep dihsha ngan phah iaid wut wut ioh lap ba slap” la ong ka menkmie.

Kumta u kpa u la leit bad rah artat ia ka wait-khmut u tan smuk pui shi pui katba u dang iaid lynti. Tang shu poi ha lum khlem da pynslem shuh u la sdang ia kata ka kam kaba u la thmu lypa. Shi kynta la iaid ka por, hynrei kita ki khun kim pat wan. Katba u dang korbar mynsiem ia ka jingslem ki khun u da lah iohsngew noh ia ka jingwan jong ki. Ka ju long ka rukom ba ki khynnah dang khie dangsan dang khluit ka ka snam ban rwai ha lynti ha syngkien khamtam haba duna ki nongiaid nongieng. Ki tang shu poi, u kpa u la thep pynstet ia kita ki dieng ha ki artylli ki ratap – kawei ia u bad kawei ia u Ksan. Ia u Bhalang pat u shu phah bah ia ki dieng rit artylli kiba jrong um duna ia ka 3 pruh ban sieh dieng thad jain. Ba ki la kit bun, kine ki arngut ki la hap ban iaid suki bad ka shim por haduh shikynta shiteng ba kin poi iing. Ki tang shu poi harud nong hynrei la lap ba ther noh u lapbah.

La u kpa u iohi ia ka jingkohnguh sneng, ka jingtipsngi bad ka jingproh jabieng u Ksan hynrei u hap pyndem toin ha ka bor ka jingkut lad bad jingduk. Tang shitaiew hadien ka jingiakren bad ka kmie, u la kren bad pynsngewthuh ia u Ksan ba kin nym lah shuh ban kyrshan skul ia u. U la pyni shibun ki j ingeh ba ki iakynduh ha iing ka sem. Tang shu iohsngew ia kita ki kyntien na u kpa, u Ksan bapli ha ka jinglong khynnah lud bad dang kwah leit skul eh, u la leh sngewsih bad khni iam. U kpa u la pynshai shuh ba jin da la don high school hangta hi ha shnong un nym jin da shlan phah pep hynrei un bteng ka jingpule bad yn shu ia bam saphit-maphit kam rat la lei lei eh. U la iathuh shuh shuh ba kin nym kot bor ban phah skul sha Nongstoin ne sha Sor Shillong. [yn dang bteng]