LANO PAT???

P.B.S

[ba bteng] Ha kata ka sngi ‘Parent’s Day’ la khot sngewbha ruh ia u nongmihkhmat heh tulop ban sakhi ryngkat ha kata ka sngi. Haba la poi ka item ban sdang noh ia ka debate, baroh ki khynnah skul ki la shong lain beit shriak bad pyn jar jar ba la shah hukum ha ka principal. Tang shu sdang ka debate ki judge (nongbishar) iwei i kynthei bad iwei ki shynrang ki la sngap bha kliaw bad peit shin bha ia ki nongiashim bynta khnang ban khein poin.

Tang shu la dei ka pali ieng u Bhalang baroh ki khynnah, ki nonghikai, ki nongtrei ka skul bad kumjuh u kongsan ki shu peit iap biej namar ka jingtbit eh jong u ban kren ha ryngkat ka sur kaba shai bad sur rangbah. Ka jingkhihmet khihphad ka jong u bad ka dur jinglong riewsaid jong u ka la pynlong ia u ban khur bun poin. Katba nang iaid ka jingiatai, ki nongpyrshah (against) ki la pyni la ka nia. Hateng hateng ki la don kiba kohnguh khlieh ia ka nia ki nongpyrshah hynrei haba la ieng pat sa ka moshon (motion) bun ki la thapkti kaba pyni ba ki sngew iahap eh.

Ki khynnah kynthei bad khynnah shynrang kiba stad kim dei ban pynkylla ia ka jingmut jingpyrkhat jong ki bad buh ia ka thong ban pyniohkam hi ialade (self employment) ban ia ka kam siew tulop (paid employment). Peit kine ki long ki jingmyntoi balei ba ka pyniohkam hi ialade ka kham long kongsan.
(1) Phi ioh a ka jinglaitluid
(2) Ka jingioh ha ka kti jong phi hi
(3) Ym don jingpyrkhing ia ka por. Phi lah ban wan bad leit ha la ka mon.
(4) Phi pyrkhat laitluid ha lade. Phi lah ban mutdur lypa haduh katno phin pynheh ia ka kam.
(5) Ka lad ka lynti ka plie ia phi ban pynhun bad pynbun ia kaei kaba phi lah ban khring ia ki kostomar.
(6) Phi ioh ka jingsngewhun bad ym don kaei kaei kaba pynkhuslai ia phi.
(7) Ka long kumba plie lad ban ai kam ia kiwei.
(8) Phi lah ban pyndonkam hok ia la ka jingtbit bad ka jingmutdur phuh samrkhie ban pynbun ia ki mar.
(9) Kane ka pynlong ia phi ba phin lah ban pynlang pisa na ka bynta la ka iing.
(10) Phi sngewlaitluid ki jingmut jingpyrkhat.
(11) Ym don nonghukum ne nongmushlia mano mano ruh. Ka jingkylluid, jinglaitluid bad jingkhuid ha ka kti jong phi” u la pynkut.
Baroh ki ia risa shaw. Ki nongpyrshah kim don nia shuh da kumwei. Ka por sa ban kut noh tang da ki sekhon.
Hadien ba la dep khein ia ki poin da ki nongbishar, u nongbishar shynrang u la ioh ban pynbna. Ka motion ka ioh 450 poin katba ki nongpyrshah ki ioh 250 poin. U Best speaker la ioh da u Bhalang.
U kongsan haba la dep sam prais bad ai syndon ia ka jingkren u la iaroh jur ia u Bhalang namar u ioh ia ki poin kiba shongnia bad kiba da dei shisha. U kongsan u la ban ba lada ki samla ka Ri jong ngi ki jied ia ka bynta ban long kum ki nongseng kam lajong khlem pep bad khlem artatien kin mih ki heh spah kiba pawnam kum u Mukesh Ambani, u Tata bad kiwei kiwei de. Bad kata kan kyntiew ia ka Ri bad kan long ka jingkyrkhu na ka bynta ka iimlang sahlang. [yn dang bteng]