Deibormi Nongpoh
(Ïa kane ka poim la ai nam (dedicated) sha baroh kito kiba la khlad noh na kane ka pyrthei bad ba la shah ktah ha une u khñiang jingpang Coronavirus ne u Covid-19).
Na shatei sha lyndet mangkashang u mih,
Ïa ri ka pyrthei u la pynkhih; U sar ï’u rit, ï’u khraw khlem isynei,
U rung jan man ki ri ka pyrthei. U Covid nineteen ïa u ki khot,
U la pynhiar ïa ka ïoh ka kot. Ïa pyrthei u la pynkulmar,
La thud ka synshar ka khadar.
Na mih ngi u her sha Italy, Jingim u la shim bun ha kane ka ri;
Da shyntur itriem u la jliah bun ki mynsiem, Ei ban khanglad?
U rung wat ha ïing syiem.
Ha kti Jong u ka sngi kam ju sep, u synshar donbor
Bad knieh ki mynsiem kordor.
Ïa dewbah ka jingstad u mut ban pynngam,
U ktah ruh de ïa ka ïoh kam ïoh jam.
Hangne la pynbna u myntri rangbah ka ri,
Da khangdam baroh kawei ka ri;
“Snoh kti kawei ïa ri ban da
Ban nym pur une u khñiang jingpang ba ma”.
Pyrthei la jynjar, pyrthei la kulmar, Jingma ka ap, jingpang kan sar,
Ki ïew, ki nongbah ba khraw ki la khang,
Sngewsih ba jingtep ki ïai ang.
Bun ki la duh ïa la kiba ïeit bad ïa ki la tep kyrkieh,
Ummat ki la jaw, sngew kumba ka sngi ka phet rieh.
Ki nongïap kim ïoh khublei kti ïa la ki baieit,
Jingïap ka rong, ki leit, khlem ïoh ban peit.
Ïa nongïap ym don por ban leh burom,
Ba tyrsim triem ka jingïap ki ïai thom.
Ïa synduk jong ki ym don jingpynphuh syntiew,
Ne ki nongpule shithi sngewlem ki briew.
Shano ki lok ki jor ba ki ieit eh,
Ha syndah ban wan shong bad shadem ba kyndeh?
Ei ban boi ha syndah jong ki bad ban ïam?
Ei ban pyntngen ban pynjah jinglengam?
Ïano yn tied baje?
Ïano yn pynrung ha ïingmane?
Ym shym la pynsawa ïa ki sur ka ri bneng,
Ym don por ban pynlong jingïaseng,
Ne ban leh kumba ju leh,
Namar ïa ki kti ba triem ka jingïap ym don ba lah ban teh.
Nga kylli, nga kylli,
Kumba la kylli da u nongkylli:
U briew un long aïu
Lada Me, Men nym wan khmih ïa u?
Ka pyrthei ha jingma,
Tang U Blei ban ïada.
Ki surok bah ki kynjah, ki lynti shnong ruh kumjuh,
Ki kali ïa met ïap sha jingtep ki leit buh.
Ki rud nongduriaw, ki madan bah ki kynjah,
Lyoh dum wat ïa ri khraw bor u la kah.
Bun ki mynsiem hangne la duh ei,
B’la trei kane ka jingpang ba shyrkhei.
Ïa ki tamasa, ki skul la pynsangeh
Ba ‘er jingma ka beh.
Ïa jingïalum paidbah la khang,
Ïa ki Duwan jingmane Blei la khang.
Ha kum kine ki por ki sngi
Ka wan ka jingkylli:
Kumno Duwan shimet jong ngi
Ï’u Blei ki rhem ban shakri?
Ka Sunday slatlai
Ka sngi thohdieng ba bha bad jingmihpat U Trai
Ngi duh ban rakhe,
Bad tang ha ïng ngi pyndep jingshakri, jingmane.
Ki khubor ha TV man ka sngi ki pyni
Ïa jingïap ba sar ha bun ki ri,
Ki bthah ki pynbna kumno ban ïada
Na une u khñiang jingpang ba ma.
Ka pyrthei man ka sngi ka ïai ñiew ki nongïap,
Ki riewstad man ka sngi ki wad jingïarap.
Hangne u myntri rangbah ka jylla jingpynbna u ai:
“Ha sngi mih pat U Trai, ïa jylla to duwai,
Hynriew baje janmiet baroh to ïasnoh
Ba Blei ïa ri un da un jngoh”.
Ngam lah ban klet kane ka sngi,
Ha ïing ngi pyndep jingmane, jingshakri;
Jingduwai, Jingrwai ka jingkyrmen la pynher
Ba Blei ïa ri un da un ker.
Hynrei khadlai tarik u nai ïaïong,
Khubor ngi ïoh, kumba wan tap u lyoh ïong,
Ki Ong, “b’u ne u khñiang jingpang u la wan shong
Hangne ha sor Shillong”.
Ka pyrthei ka lynga, ka pyrthei ka pisa,
Ka pyrthei ka ïohi ba ka don ha jingma;
U nongrep u la lynga ïa ka thung ka tep,
Ka lyngkha ka la ap khmih ïa u nongrep.
Ka wait, u mohkhiew ki la lyngngoh
Ba la bun sngi ïa lyngkha kim ïoh tang ban jngoh.
Ki lum ki them, ki kshaid bad ki Wah,
Ki la lyngngoh shano ba bynriew u jah.
Ka khyndew ka la kwah ïa u symbai,
Ki jaka jngohkai ïa ki nongshang kai.
La bun sngi ha ïing ngi la hap ban shu shong,
Nga sngew kumba ka miet bad ka sngi ki nangjrong.
Ei ban ïohi ïa ki rong ka pyrem?
Haba la shu shong tang ha ïing ha sem.
Ki baje ha ki skul ki khlem sawa shuh,
Ka mariang da kawei pat ka dur ka phuh.
Ki sngi ki leit, ki sngi ki wan,
Ka pyrthei pat de ka la nanghiran.
Ki kyndoi jakpoh ki la im ha sngewsih,
Ki la jynjar ïa ka bam ka dih.
Ym don ba khraw, riewspah, duk ne rangli,
Khlem map u thew pynjot ïa ki.
Lano kito ki jingtep kin kdang? Nga kylli,
Lano kjat sngi jingjop pyrthei kan i?
Sa Katno mynsiem ba jingïap kan rong
Ha ki sor bad ki nongkyndong?
Ai sur ka jingkyrmen kin ïai sawa
Ha ki rympei ïing jong ngi haman ki kynta;
La bun mynsiem ngi la duh,
Jingkyrmen ban jop te ngim duh.
Bret ki jingïabishni,
Bret ki jingïakdew kti,
Bret ki jingïasngew niam,
Wat shah kine ïa ngi kin riam.
Ki jingsngew pher jaitbynriew to pynduh,
Ki jingsngew politics to pynduh.
Ngim dei ban ñiewbeiñ ïa ki nongpang,
Ïarap katba lah to pyrshang.
Ïa ki doctor, ki nurse ngim dei ban ibeiñ,
Ïa imlang ki pha jingim kim kheiñ.
Ïa ki to kyrshan, to ai mynsiem,
Peit ki don mynta ha thma ba sngew triem.
Kynmaw da jingngeit h’u Blei ngin ïai neh,
Lama jingjop ngin kaweh;
Ha kawei ka sngi ngin jop,
Ngin jop, da jingïatrei lang ngin jop
Phi don ban ong eiei?