Lamkhmat ka Meghalaya ia ka Arunachal, ha ka sngi nyngkong jong ka Ranji Trophy

Shillong:Ha ka sngi ba nyngkong jong ka jingiakhun hapdeng ka Meghalaya bad ka Arunachal Pradesh ha ka lym pung Ranji Trophy ba la ialeh ha Anand, Gujarat, ka Meghalaya ka la lah ban lamkhmat ia ka Arunachal da 109 run.

Ka Arunachal kaba la jied ban tied nyngkong hadien ba ka la jop ia ka toss, ka la tied tang 94 run haba ka la hap lut ki nongtied jong ka tang hapoh ka 30 over. Ha ka pali tied jong ka Megha laya pat, ka la lah ban kamai haduh 203 run da kaba duh tang 2 ngut ki nongtied ha shuwa ban pynkut noh ia katei ka sngi da ka jingpynlut 58 tylli ki over.

Ha kane ka lympung, ka Meghalaya Cricket Association ka la rai ban pynrung madan tang ia ki nongialehkai kiba dei napoh ka jylla da kaba pynsangeh shuwa ban pynrung ia kiwei pat ki nongialehkai kiba dei nabar ka jylla ia kaba ka MCA ka ju wer bad khot sngewbha ban iashim bynta lang ha ki lympung bapher bapher kumba ka ju leh ha ki samoi ialehkai ba la dep.

Hynnin ka sngi ki nongkawang bol ka Me ghalaya ki la ialehkai bha ha kaba la iohi ba tang ha ka over kaba nyngkong u Md Nafees u la lah ban pynkhyllem shuwa ia u wicket uba nyngkong, bad une u nongkawang bol hynnin ka sngi u la ioh ia ka poin da 1/16 ha shuwa ban pynkut ia ka jinglehkai
Na ka liang ki nongtied ka Arunachal ki la don tang lai ngut kiba la ioh ban kamai 10 run shaneng, hadien ba u Dippu Ch Sangma u la ioh ban pynkhyllem (4/18), u Sanvert Kurkalang (3/19) bad u Swarajeet Das (2/10).

Haba phai sha u Arien Bonchang Sangma uba dei u nongap wicket nadien ka stump jong ka Meghalaya, ka la dei ruh ka sngi kaba bha ia u, haba u la ioh ban kem hynniew tylli ki bol ia kiba ki nongtied ka Arunachal ki la tied kynriang sha ka phang jong u.

Ha ka por ba tied bol pat, u Arien bad u Swarajeet ki la kamai shuwa 32 bad 29 run na ka bynta ka Meghalaya da kaba pynianeh paralok hapdeng kitei arngut da 54 run na ka bynta u wicket uba nyngkong. Hadien jong ki pat, la shimti ia ka madan da u Ram Gurung bad u Kishan Lyngdoh uba dei u captain ka kynhun, bad kine arngut ki la iakamai lang haduh 133 run na ka bynta u wicket uba lai.
Ha shuwa ban pynkut ia ka jinglehkai, u Kishan u la ioh ban thlieh khat-ar tylli ki 4 bad dang iaineh ha ka jingkamai 68 run na ki 81 bol, katba u Gurung u la kamai 61 run na ki 115 bol bad dang iaineh hadien ba u la ioh ban thlieh phra tylli ki 4.