Laitim ki khun ba pluh ka ïing ha Mawklot | Ki ialehkai shabar, ka jingiathuh u RS

Shillong 05 Iaiong: Ka ding ka ba la klang bha ka la bamduh kynsan kynsan ia Kawei ka iing dieng ka ba don ha ka shnong Mawklot, dong sohbir mynta ka sngi jong ka 05 Tarik u Iaiong 2025.

Katei ka iing ka ba la shah bamduh ha ka ding kadei ka iing jong i kong Rishalin Nongsiej.

Ha ba ioh ban iakren bad u Rangbah shnong jong ka Mawklot u la iathuh, ba kane ka jingjia ka la jia ha kapor kumba 9 baje eiei mynstep, ha kaba ka jingpluh katei ka ding ka la bamduh ia baroh ka iing khlem iehnoh wat tang khyndiat ruh.

U la iathuh ruh, ba ha kapor ba katei ka iing ka la pluh kynsan, ki Kmie ki kpa kim shem ladon ha iing bad don satang ki khun, hynrei ki la laitim khlem mynsaw eiei namar ki ialehkai shabar.

Ka jinglut jingsep jong katei ka iing ka ba la pluh ka la palat ia ka 15 lak tyngka eiei Katkum ka jingioh jingtip jong ka shnong. Bad kadaw ka ba pynlong ia ka iing ba kan pluh kynsan, kadei namar ba ki wire ki kemding bad suki suki ka ding ka la klang bad heh kynsan bad bamduh ia baroh ki jingdon jingem, ong u Rangbah shnong.

Ka shnong hi mar shu iohi jingtip ia kane, mar mar ki la leit ban iarap pynlip ia ka ding, hynrei namar ba ka ding ka la jur palat kim shem la ioh lad ban pynlip kloi bad dei ha kapor kumba 10:30 eiei ki sa lah ban pynlip noh, hashwa ba ki Pulit pynlip ding kin wan.