Lait u Donald Trump, ha ka sien kaba ar, na ka jingthmu ban siat iap ia u

U DONALD Trump, ha ka sien kaba ar, ula lait na ka syrngiew jong ka jingiap, haba ula lait im, na ka jingthmu ban siat iap ia u, ha ka por, ba u dang ialehkai golf ha National Golf Club, ha West Palm Beach, Florida.

La pynrieh noh mar mar ia U Trump, 78, da ki pulit syntiat Secret Service, ha kaba ki la siat ruh ia utei uba thmu ban pyniap ia u Trump, uba don ia ka suloi AK 47 ha ka kti jongu bad uba dang rieh ha ka khlaw, kaba don hangtei hajan.
Kane ka jingthmu ban siat iap ia U Trump, ka jia, hadien ka 13tarik Natung, ha kaba ula shah siat na shkor ha Pennsylvania.
Une uba thmu ban siat ia u Trump, u don ha ka jingjngai kaba kumba 400-500 yard bad u dei uba kyrteng u Ryan Wesley Routh, 58.

U William D Snyder, u Sheriff ka Martin County, u kam ba U Routh, um shym la tieng ne khuslai mynsiem satia, ha ka por, ba u shah kem bad u long kynjai beit ka jingmut jingpyrkhat jongu. U Routh, u dei u dkhot jong ka seng Democrat bad ula shah kem la 8 sien, ha ki jingjia bap her bad u don 100 tylli ki jing ujor pyrshah ia u.