Lait thaw u ophisar heh ka Soil, pra ki shaka ba siat ki ehrang

Shillong, 19 Nailur:
U Divisional Officer jong ka tnat Soil Conservation, U Limbert N Marak, ula lait iap da ka said mynta ka sngi, haba ki arngut ki ehrang, ki la hiar thma bad siat pynpait ia ka shaka jong ka kali, kaba u shong, lem bad u nongniah jongu ha Ramchinga, ka lynti ban leit sha Baghmara.
La iathuh ba U Marak, uba dei u ophisar jong ka Soil ha Baghmara, u dang leit sha la ka jong ka kam, da ka kali ophis ka Bolero, hynrei kitei ki ehrang, ki la siat da ki suloi kiba khlain bha bad pynpait ia kawei ka shaka jong katei ka kali, kaba u shong.
Ha ka jingtieng, u draibar jong U Marak, u iaid beit shakhmat haduh ka jingjngai kaba shi kilometre bad ki sa bujli ia kitei ki shaka kiba la shah siat pynpait ha kitei ki ehrang.
Ki ehrang, kim shym la bud dien satia ia katei ka kali, hynrei la iathuh ba ki la phet noh bak sha khlaw, haba kim shym la lah ban pynsangeh ia katei ka Bolero.