Lait thaw u nongniah Maruti Car, ba tynrah ka Trok ha Saiden

Nongpoh:Ha ka jingjia aksiden kaba la jia mynhynnin ka sngi u Blei hapoh ka surokbah NH-6 bad kaba hap hapoh u pud u sam ka shnong Saiden, uwei u nongniah jong kawei ka Maruti Car kaba don ia u number ML-05-F-0872, u la lait thaw na ka jingmynsaw bad jingjia ba sngewsih bad kata ka dei hadien ba katei kali Maruti Car kaba u niah, ka la shah tynrah ha kawei pat ka Trok kaba don ia u number ML-05-U-7080.

Katei ka jingjia iatyngkhuh kali, ka la jia mynhynnin ka sngi U Blei ha ka por 12.30 baje mynsngi, ha kaba katei ka kaba la niah da u Bah John Dkhar ka la rad ia katei ka Maruti Car kaba la niah da u Bah John Kenny Longshiang.
Ha kane ka jingjia iatyngkhuh kali, u nongniah jong katei ka Maruti Car u la lait salit na ka jingmynsaw, hynrei u la shu pangmet pang phad, namar ba katei ka Trok kaba la tynrah ia katei ka kali Maruti Car, ka la lah ban sangeh noh shwa ban tynrah ia katei ka Maruti Car, da ka jinglah jong u nongniah ia katei ka Trok ban iuh Brake.

Halor kane ka jingjia, ym lah ban batai shai mano ba bakla haduh ba ka trok ka la ioh lad ban rad ia katei ka Maruti Car kaba la shakut syndon hapdeng surok, hynrei ki bor pulit na Nongpoh Police Station, tang mar ia ioh jingtip ki la wan poi sha katei ka jaka na ka bynta ban pynlong ia ka jingtohkit kaba bniah.