Lait thaw u heh pulit, ha ki kuli ka GNLA

Shillong, 10 Jymmang:
U heh ka Meghalaya  uba bat kum u Additional SP u Ringrang Momin u la lait thaw na ka tyrsim ka jngiap hadien ba ki dkhot ka GNLA ki la hiar thma da kaba ap ktem hapoh ka jingialam u Commander jongki u Philiport ba tip kum u Rakban D Shira. Une u heh pulit u la mynsaw na ka jingdei ki kuli jong ka GNLA ba ki la synreit kuli ha ka por ba ki pulit SWAT bad ki CRPF ki pynlong ia ka jingkhynra ha kane ka sngi Saitjain.
U SP ka North Garo hills u Ramesh Singh u la ong ba ia u Momin  la rah wut wut sha jaka sumar hadien ba u la mynsaw na ka jingsynreit kuli ki GNLA. U la iathuh ba kane ka jingjia ka la long ha ka por ba ki pulit ki la wanphai na ka jaka khynra kiba la shah hiar thma kynsan ha ki dkhot ka GNLA kiba la apt hap lypa. Une u ASP u dei u MPS ka snem 2004 u dei uwei uba la shlur bha bad uba ki lehnoh ki ap thap bha ia u. Ha u Nohprah 2014,  ki lehnoh jong ka GNLA ki la synreit kuli ha jaka sah haba ka lok bad khun jongu ki don. U Momin u la ioh khusnam riewshlur ar tylli halor ka jingshlur bad ka jingtbit jongu.
Ha ka jingther kuli ki lehnoh GNLA ha ka por ba ki dang iaid, ki pulit ki la ther kylla bad ha kane ka jingiather, u Momin u la mynsaw na ka jingdei ki kuli.
Kane ka la jia ha shnong Achongba hajan ka Mendipathar  ka North Garo hills kaba jngai kymba 125 km na Tura. Ki pulit ki la pynlong ia ka jingkhynra biang ha katei ka thain ban thwet ia ki lehnoh.
“Kane ka jingiather ka la neh katto katne minit bad u ophisar jong ngi, u la mynsaw”, la ong u GHP Raju u inspector general of police (Operations).
U Momin u la sumar ha Goalpara bad la pyn kynriah pat sha Guwahati. U Raju u la ong ba ka GNLA ka la pyrshang ban pyntieng ia ki paidbah bad ka la pyrshang ban buh bom IED ha Dalu ha  West Garo Hills kaba don ha khappud ka India bad ka Bangladesh ha kane ka sngi Palai.