B.M. Lanong
Ka don ka jingong, ba lada u ksuid ruh u leh ia ka babha, hap ai burom hi ia u. Niuma, don bun kiba pyrshah ia u Chief Minister Conrad Sangma ha ki kam sain pyrthei, hynrei lymda dei na u, ba u phah ia ka kam projek ‘Svamitva’ jong ka Sorkar India, sha ka District Council KHADC ha u 2021, ban katta la lko pom bad la kylla Manipur shuwa ka Meghalaya.
Haba la wan kat katei ka kam Svamitva na Delhi ba phah ka sorkar u Mody, ka kam thew khyndew najrong suin da kita ki drone kiba her, ka Sorkar jylla u Conrad kan jin da la lah ban leh hi, da kaba pyndonkam da ki DC, BDO, kiwei-kiwei ki ophisar tnat Sorkar bad ki pulit, hynrei u phah sha KHADC ba kan shimti ban leh ia kane ka kam, ha ka por ba long CEM u Bah Titos Chyne.
Haba dang eh hi ka rngiew imat, ka hok ruh ka iada, baroh ki MDC kiba la ia syllok ha ka jingialang, ynda ngi la pule katto-katne por, ngi la kyntait mardor, haba ngi iohi ba katei ka kam kaba phah na Delhi, ka don ka jingriam bashyrkhei ha lyndet.
Kane ka dei kata ka “Drone Based Large Scale Mapping of Rural Abadi Areas….”(Thew da ki drone her suin ia ki shnong kyndong ha ka jylla)
Nga la thoh bunsien ia kane ka mat, namar ka long kaba ma shisha, hadien ba nga la pule bniah bha ia ka. Kan bha ba kiwei ruh kin pyrshang pule ban sngewthuh katba lah ei.
Ka long ka jingshisha, ba ma nga ruh nga la ktha khlieh ban pule ia ki jnit ki jnat kiba shitom ban sngewthuh (highly technical, scientific terms) ia kiba ngan kdew tang iwei-ar tylli ban ioh jingmut.
Kane ka kam (project) kaba don haduh 17 sla, nalor 25 sla kiwei-kiwei ki bynta kiba kdew bad pyni ruh sa da ki dur ki dar, kiba bthah ban thew haduh 6846 tylli ki shnong sha ki nongkyndong, da kaba pynher da kita ki lieng her suin (drone), kibym don briew bad ban pyndonkam da kita ki CORS Network (Continuous operating Reference System) bad kiwei.
Katba ha ryngkew pat kin don ki nongbylla nongwei ha kitei ki 6846 tylli ki shnong, kiban wanrah da ka tnat survey of India kiban iashong kyrsum lang bad ki trai shnong, ym duna ia ka 5 snem, lane haduh ynda la pyndep ia kita ki kam thew ha ki shnong ki thaw. (Nga lah dep kdew ba kine ki kam thew kin kham bun shapoh ki ing ki sem, ban ia kaba sha ryngkew).
Ka shai kdar ba kane baroh ka long ka jingthmu ban wanrah noh da ki nongwei nabar ha kylleng ki shnong ki thaw.
La sngewthuh kamut aiu kane
La mang lypa ruh ba ha kane ka kam, yn kynthup lang ruh ia kiwei ki tnat (private co) kiban long ki kontraktor, ki kompeni, kiban shimti bun ki kam ban tei ia ki ing ki sem ban sah ki nongtrei bad kiwei-kiwei ki jait jingtrei (outsource) ha kylleng, khamtam ia ki jingtei ba kyrpang kiba dei ia katei ka projek Svamitva.
Kumta kin sa wan da ki phew tylli ki kompeni shimet nabar jylla ban wanrah da ka Survey of India bad ka Tnat Panchayati Raj ka Sorkar India, ryngkat bad ki phew hajar ki nongbylla nongwei.
La mang ba ka sorkar Meghalaya kan hap pynbiang ki jaka sah bad jaka trei kam baroh, kynthup ia ka bording ilektrik nalor kiwei-kiwei bad ban kit khlieh ruh ia ka jingpyntrei kam ia kane ka projek.
Tip kaba mut aiu, hynrei la buh bynta ruh ia ka sorkar Rajasthan ha kane ka projek, kaban pynbiang ia ki buit treikam bad ia ka thew ka woh. (Mechanism and Surveying).
La buh por ba dei ban pyndep ia kine ki kam hapoh 24 bnai lane 2 snem, ia kaba la kdup lang sa ia ka Tnat Panchayati Raj jong ka sorkar India kaban pynbiang lang ia ka lut ka sep ha kane ka projek, kaban poi kumba 144 klur tyngka ei-ei.
Lada mih mokotduma
Ka sorkar India ka la iohi lypa ba hapdeng kine ki kam kynrum-kynram, kin sa mih hi ki jingiakajia bad ka la mang lypa, ba lada mih kino ki kam iapher jingmut (arbitration) ka rai ia kita yn shimti da kane ka tnat Panchayati Raj, kaba dei ka tnat jong ka sorkar India hi.
La kdew ruh ba ia ki jinglut jingsep baroh ha ka mokotduma, yn ia bei lang mar kumjuh hapdeng ki mamla, lait noh ia ki jingjia khyllah ba leh da ka mariang (Act of God).
Ka jingkylli ka long, hato ka tnat jong ka sorkar India, ka lah ban pynrem ia ka sorkar lajong? Tip balei bym buh kat ia kane ka kam ha ki Tnat Bishar Ain (court)? Tang hangne ruh la sngewthuh lypa ia ki jingjaboh hapoh kane ka kam.
I kumba ka la jah rngai kane ka projek ia mynta.
Ioh Medal Rnong I Kongthong
I shnong Kongthong ha Sohra 12 shnong, iba don tang kumba 140 ing ei-ei bad tang hapoh 700 ngut ki nongshong shnong, ibym don iew don hat, ne ki hotel ban iasah ki nongleit nongwan, ne ki jaka jngoh kai pyrthei, hynrei tang namar ba u MP BJP na Bihar ula leit la wan bha bad pynsawa ia kata ka rukom siaw kaba sngewthuh ki para shnong ia ki jingmut, ilah da ioh ia ka nam ha ka kyrdan balai (Medal Rnong-Bronze), kum ka shnong ba hakhlieh ha ka jngoh kai pyrthei, (National Tourist Awards 2023).
Koit ka biang kane ka jingioh nam, hynrei ki bor sorkar, ki MLA, MDC ruh ki dei ban kham noh jingiarap noh ia ine i shnong, khnang ban ri ia ka burom haba iawan ki paid toris na kylleng.
Hynrei kaba kham dei ban pyrkhat ka long ia ki jingkynthoh ki babun ki riew pyrkhat, kum i Kong Patricia Mukhim, i Rev. Kyrsoibar Pyrtuh, Bah H.H. Mohrmer, Bah Disparsing Bani, H.T. Wells bad kiwei de, halor ki jingsahdien ka jylla, don kiba kynthoh ruh ia utei u MP ba u don por ban leit ban wan shaduh shane, ka jaka kaba wat ki trai jylla ruh bun kibym pat tip bad ki bym pat ju poi, utei u MP pat u ieh ia la ka Bihar sahdien, ban rung shaduh shane, tip dang don ei-ei shuh nalor itei i jingsiaw jong ka ‘whistling village’?
Ka leit ka wan ri Khasi jong u, ka la khring sa ia u tymmen Mohan Bhagat, u khlieh ka RSS ba un wan shane bad u la leit kiew syndon shaduh u Lum Sohpet Bneng. Ynda ula nang sngew shongshit, u poi sa sha ka jingkynthoh ba “baroh ki nong India ki dei ki Hindu” kaba la pynlong ia kitei ki khraw pyrkhat bad ia kiwei-kiwei de ban pynrem ia kitei ki jingkren lymwir u Bhagat.
La don bun ki jingkynthoh hangne-hangtai, haba la mih kat kitei ki jingkren utei u Bhagat, kaba la ktah ia ka jingsngew ki babun ki riew pyrkhat, ia kaba la iai thoh pyrshah ruh da bun ki nongthoh.
La nang pur shuh-shuh ka lyer Bhagat, haba la mih sa ka tnat RSS shane ba ialam ruh da ki samla bad rangbah Khasi. To kam pher wat kane ruh, hynrei kumno kine pat ki sngew ia kitei ki jingkren u Bhagat, ba baroh ngi dei ki Hindu?
Kaba nang phylla shuh-shuh ruh ka long sa kata ka jingpynkylla kyrteng noh ia ka ri India, sha ka Bharat, kaba la pyrshah ha kylleng ka ri India.
Ban sha ngi lei shane te ban ai kyrteng ‘Bharat’ sha West Khasi Hills, ym dei shuh tang ban kyntait, hynrei kumno yn khot syndon da ka kyrteng kaba mut “Bym Bha – Bha Rat?” Lane “Bharat Government- Sorkar jaboh”.
La nang pynjrong ksai shuh sa da kata ka jingpynkhuid shnong ha ka ri baroh kawei, ka Swach Bharat, ha ka 2 October sngi Sunday, kaba ki Khasi Kristan ki ong ‘Sngi u Blei’ kaba baroh kawei ka pyrthei, ki briew ki shongthait ha kane ki sngi kut taiew.
2 tarik October 2023 ka dei sngi nyngkong bad ka rukom thoh ka headings bad ka ta ka rukom batai story kam don jing iadei ha ei ha ei, la da phi mut ban kren shaphang ka influx bad ka niam kren beit da ka ba shai, wat leit batai stad sha manipur lane kynthoh ia ka shnong kongthong, to ngin ia map ia ki jing bakla jong phi u nongthoh ba shu pyrshang hynrei sa shisien te thoh kham bha noh ne da phah shim tution shwa phah screen shwa ban pynmih khubor