Lait thaw ki pulit, ha ka jingther kuli ki GNLA ha Shallang

Nongstoin, 8 Nailar:
Hynnin ka step kumba ha ka por 10baje, ki 8 kynhun jong ka 3rd MLP katba ki dang wan phai na Rongjeng bad thmu ban leit phai noh sha la ka jaka trei kaba ki ju don barabor, hynrei kitei ki kynhun pulit, ynda ki la poi ha ka shnong Nongchram kaba don ha ki thain Shallang ka la don ka jingshah pynap shrip kaba kyndit ha ki kynhun kaikhlaw.
U SP ka WKHD u bah S. Nongtnger u la iathuh ruh ba kitei ki kynhun kai khlaw ki la ia ap bad rieh lypa ha katei ka shnong bad tang mar ia poi kitei ki kynhun pulit ha katei ka shnong, kitei ki kynhun kaikhlaw ki la hiar thma ia katei ka kynhun pulit.Na ka liang jong ki pulit ruh khlem kynran dien ki la ialeh pyrshah ia kitei ki kai khlaw.
Ki ophisar ka Shallang PS mar ia ioh jingtip halor katei ka jingjia, ki la her bran bran sha katei ka Shnong ha ryngkat lang bad ki SWAT lem bad ki Battalion ban ai ka jingiada ia kitei ki 8 kynhun jong ki pulit bad ha ka juh ka por ban thwet ia kitei ki kynhun kai khlaw kiba la phet krad na katei ka jaka.
Shuh shuh u SP u la iathuh ruh ba ha katei ka jingjia ym shym la don ba iap ne mynsaw, hynrei la julor tang malu mala tang ki ar tylli ki bus, kiba la kit ia kitei ki kynhun pulit.
Kiwei pat ki lah khubor, ki iathuh ba katei ka jinghiar thma, ka dei kaba la ialam hi da U Sohan D Shira, uba dei u nongialam ba ha khlieh duh jong ka seng ehrang GNLA.