Lait thaw ka pharmacy, na ka jingpluh, ba thmu leit thang ki runar

Nongpoh: Kawei ka dukan die dawai (Pharmacy) kaba don ha shnong Pahamsyiem bad kaba hajan ka Axis Bank, ka la lait thaw da ka said na ka jingpluh, kata ka dei hadien ba la don ki riew runar, kiba la thmu ban leit thang ia katei ka Pharmacy, da kaba pyndonkam da ki kynja Umphniang Petrol.

Katei ka Pharmacy, ka dei kaba la tip kum ka A.S Drugs Store bad kaba la dei trai da u Muneshwar Singh, ha kaba la ong ba hynnin ka miet sngi Saitjain, u la mih na katei ka dukan ha ka por 8:30 baje mynmiet, hynrei haba mynta ka sngi, ba ki nongtrei jong u, ki la thmu ban leit plie ia katei ka dukan, ki la lap ia ki bilor plastik ba la thep petrol bad ki jain ba la pynsngem da ka petrol, ki tiar kiba la suba jur ba ki runar ki thmu ban thang ia katei ka Pharmacy.

Katei ka dukan, ba la thmu thang da ki runar kam pat kemding, hynrei ka jingkhang ne ka Shutter jong katei ka Pharmacy, la don ki dak ki shin ba ka la iong na ka jingklang ka ding.

Haba iadei bad katei ka jingjia, u trai jong katei ka Pharmacy, u la ujor da ka Ejahar sha Nongpoh Police Station bad uba la kyrmen, ba ki pulit kin leh ia kaba donkam bad ban kem ia kiba donkti ha katei ka kam runar.