Lait thaw ka petrol pump na u nonglute

Jowai, 20 Nailur:
Hynnin ka meit ha ka por kumba 8 baje eiei, kawei ka Petrol pump ha Jowai ka la lait salit na ka jingshah lute ha uwei u briew ba tapmoh jain khmat bad rah pistol.
Ka jinglait shah lute katei ka petrol pump kaba la tip kum ka Challam Syngkon Petrol Pump kaba don ha New Hill, Wah Gate ka dei namar ka jingshlur ki ar ngut ki nongtrei katei ka petrol pump kiba la ia khun bad utei u nonglute haduh ba kin da mynsaw malu mala ia lade.
U Manager jong katei ka Petrol Pump u Sampat Sharma u la ujor sha ki pulit halor katei ka jingjia. Katkum ka jingujor jong u, u la ong ba ha ka pormeit 8 baje eiei, la wan rung kyndit uwei u briew tapmoh khmat ha ryngkat ka pistol da ka jingthmu ban lute ia ka pisa kaba dei ban rah na katei ka petrol sha jaka sah jong u.
Ki pulit ki dang tohkit ia kane ka jingjia bad ban iohkem ruh ia utei u runar ba don pistol.