Shillong, 13 Nailur:
U Joint Director, Mechanical-Directorate jong ka ka tnad Agriculture, u bah Ropsil Lamare uba la shah kem halor ka jingbam sap 1 lak tyngka na u trai jong ka M/S Horizon Marketing Tura, u Ashok Agarwal, um pat lait jamin satia, hynrei u dang shah set phatok (judicial custody).
Na ki khubor ba la ioh lum la iathuh ba, u tei u ophisar bamsap uba dei ban shong ha phatok um shym shah set satia ha phatok, hynrei mynta u don hapdeng ka jingshah sumar ha Civil Hospital Shillong, hadien ba u la ud ba u don ka jingbym sngewkhlain ha ka met ka phad.
Haba pyrshang ban wad jingtip kham bniah halor ka jingshitom kaba u tei u ophisar ioh, ym shym la ioh ia ka jingtip kaba thikna lane kaba shai la u shitom kumno, hynrei la sngewthuh ba ka don ka jingbym sngew lah ban pyniahap ialade jong utei u ophisar ban shong hapoh phatok, kumta haba u la ud pang la hap ban phah noh ia u sha Civil Hospital na ka bynta ban shah sumar.
Shuh shuh ki khubor ki iathuh ba, na ka liang jong utei u ophisar u dang pyrshang mynta ban lait jamin noh na ka jingshah set phatok, hynrei haduh mynta um pat ioh jamin satia. La iathuh ba na ka liang jong ki pulit ki la pynngat ia u ha ka kyndon ain bamsap (Prevention of Corruption Act, 1998), namar ba ki la ioh kem ha ka por ba u dang shim pisa kaba long T.1 lak.
Lah ban pynkynmaw hangne ba, katkum ki pulit la ong ba u bah Lamare u la pan pisa kumba 5000 na kawei ka bill kaba dei ka subsidy kiba don kumba 45-haduh 50 tylli ki bill bad haba khein kyllum lang ka pisa ka la kot sha ka 3 lak bad la ong ba u la pan shwa T. 1 lak bad yn sa siew hadien 2 lak tyngka. Kumta ki pulit ki la pynap shrip ha ryngkat ka jingiapynbeit bad utei u trai uba dei ban siew pisa bad na ka liang jong ki pulit ki la kem noh ha ka por ba dang leit siew ia katei ka pisa kaba long 1 lak tyngka.
Phi don ban ong eiei?