Lait sa 2 ngut ki heh ka HANM, sah u President WKHD

Shillong, 01 Risaw:
Ki 2 ngut ki nongialam jong ka HANM kynthup ia u President ka sengkmie u bah Lamphrang Kharbani bad u General Secretary bah Alban Gashnga ki la lait jamin noh mynta ka sngi, katba u President jong ka HANM West Khasi Hills District bah Arphul Kharbani u dang don ha kti jong ki pulit.
Na ka liang jong ka seng Hynniewtrep Achik National Movement (HANM) lyngba ka kyrwoh ba la phah da u Asst. General secretary u Bah Darmonmi Susngi Dkhar u la pyntip ba ka seng ka la weng shwa shipor ia ka jingiakhih hadien ba la pyllait ia ki 2 ngut ki nongialam kata ia u President ka Sengkmie u Bah Lamphrang Kharbani bad ia u Alban Gashnga.
Kumta ka seng ka la rai ba ia ka jingthmu ban leit shong kyllain myngor hakhmat ka Secretariat ka ban long ha ka 3 tarik mynta ubnai la pynsangeh noh shwa bad ka seng kan dang shong jingialang kyrkieh ban pyrkhat na ka bynta u President jong ka HANM-West Khasi Hills u Bah Arphul Kharbani uba dang shah bat mynta ha kti ki pulit, la ong shuh shuh u bah Darmonmi.
Lah ban pynkynmaw ba ki pulit ki la kem ia kumba 20 ngut ki nongialam ka HANM kynthup ia uwei u nongniah taksi na iingsah jong u bah Lamphrang Kharbani kaba don ha Mawkasiang ha ka 26 tarik mynta u bnai kaba dei ka sngi dap 5 snem jong ka HANM.
Hadien kane ki pulit ki la pyllait noh shuwa ia ki 17 ngut bad ki la bat ia ki 3 ngut ki nongialam ba hakhmat jong ka seng bad mynta ka sngi la pyllait noh ia kine ki 2 ngut ki nongialam ka seng lait noh satang u nongialam jong ka HANM uba dei na West Khasi Hills.