‘Lait Na Phi’ ki kaitor na shnong Pyrnai

Shillong, 29 Naiwieng:
Ka shnong Pyrnai kaba don ha thain riwar sharum ka Pynursla ka la sakhi ia ka jingmih ka thup jingrwai na ki samla kane ka shnong kaba la pynlait paidbah da u rangbah SB Tariang ha ka jingialang ha ka janmiet sngi Saitjain ha kane ka shnong.
Ia kane ka thup jingrwai CD ba la ai kyrteng ka, “Lait Na Phi” (without you..) la pynmih da ki samla kane ka shnong kynthup u Bah J Khongkhlad bad Bah Fartune Khongkrom bad la rwai da  8 ngut ki kaitor kane ka shnong kynthup u Bah Fartune Khongkrom, Bah Plesimai Khongsdam, William Khongsdam, Helon Binan, Tonic Khongtim,TR Khongkhlad, J Khongkhlad bad Realmen Nongrum.Ka phang pdeng jong kane ka jingrwai ka dei shaphang ka jingieid samla bad kiwei kiba ktah ia ka jingshem mynsiem.Haba kren lyngkot kum u kongsan u bah SB Tariang uba dei u president ka Riwar Mihngi Development Council (RMDC) u la ong ba ka tnad Arts and Culture ka don ka bynta ban ai jingiarap ia ki samla ba don sap ha ka siaw ka rwai bad kumjuh u nongmihkhmat ka thain u dei ban ai jingiarap ban kyntiew ia ki samla kiba don ka sap ka phong.“Ki samla ki dei ban leit iit jingiarap na ka Arts and Culture bad ruh ka skhim MLA ka don kaba la mang kyrpang ia ki samla ba don sap ha ka liang ka put ka tem”, la ong u Bah Tariang.
U la kyntu ia kine ki samla ban nym kynran dien ha ka lynti iaid jongki wat hapdeng ki jingeh jingtynjuh kiba bun. “Pyndonkam hok ia ka sap ka phong jong phi kaba la ai da u Blei nongbuh nongthaw”, la ong u president ka RMDC.U la ong ba ka ju don ka jingong ba ka thain Mawja ka dei kaba kham sahdum hynrei kumba ka paw mynta, ka dei kaba la kiew bha khamtam ha ka siew ka rwai kaba lah ban ong ba ki la iaryngkat bad kiwei. U la kyntu ia ki nongshong shnong bad ki paidbah ba kin ai ka jingkyrshan ia kane ka kynhun nongrwai da kaba thied ia ka CD kaba shong dor tang T. 90 kawei khnang ba kin lah ban bteng ia ka jingrwai kaba kham janai shuh shuh.Ha kane ka sngi la ioh ruh ia ka jingkren na u Rangbah Shnong ka Pyrnai u Bah Centreson Khongsdam, bad ia ka jingialang la pynlaid da u Bah December Khongsdam.