Lait jamin u CEM barim, bteng shah thngan khlem buh por

Shillong, 19 Jymmang:
U CEM barim ka KHADC u Bah Adelbert Nongrum u la lait jamin na ka Kashari hynne ka sngi hadien ba la shah set shi miet ha Shillong District Jail halor ka jingkren pyrshah jongu ia ka rai ka Kashari High Court.
Haba kren sha ki nongthoh khubor hadien ba la wan poi biang ha jaka shah thngan mynta ka sngi Hatmajai na jaka set, u Bah Nongrum u la ong ba u ioh jamin na ka Kashari hadien ba u la phah ia ka jingthoh panmap ba khlem buh kyndon bad ka jubab sha ka Kashari halor ka jingkren pyrshah jongu ia ka rai ka Kashari.
“Ngan bteng beit ia ka jingshah thngan”, la ong u Bah Nongrum hapdeng ka jingsngew tlot ka met namar ka jingshah thngan la saw sngi.
Nalor u Bah Nongrum, u samla Warjri ruh uba don lang naduh ba sdang shah thngan, u la rai ban bteng beit ia ka jingshah thngan bad u CEM ha katei ka jaka ba don u dur mot jong u Kiang Nangbah ba don hajan Shillong Civil Hospital.