New Delhi:Ka Supreme Court ka la pynlait jamin ïa kawei ka longkmie Khasi halor ka jingshah kynnoh ba khaïi briew halor ka nongrim ba wat hapdeng ka jingduh noh kaba la jan 2 snem, ka jingbishar kam shym la sdang bad ka Ïing Bishar ka ong ba ym lah satia ban shu pynshong Patok khlem sangeh.
Ka jingïalang ki nongbishar ba kynthup ïa u Chief Justice NV Ramana, Justice Surya Kant, bad Hima Kohli ki la ai jamin ïa ka Kong Drabhamon Phawa, ka Longkmie kaba la 21 snem ka rta na Meghalaya, kaba la shah kynnoh donkti ha ki kam khaïi briew.
“Hadien ba la sngap ïa ki muktiar jong baroh ar liang bad da kaba pyrkhat ïa ka jingshisha ba ka nongkyrpad ka la shah shitom shah set byndi kumba 18 bnai bad kumjuh ba ka la kha khyllung ha ki por ka jingshah tohkit, ngi sngewdei ban ai jamin ïa ka,” ong ka hukum ka Ïing Bishar Supreme Court.
La ong ba ka Kong Drabhamon Phawa ka la armet ha ka por ba la kem ïa ka bad ka la sah ha Patok naduh u bnai Rymphang, 2020. Ka la kha ruh ïa I khyllung hapoh Patok.
Na ka liang u Senior advocate Salman Khurshid bad advocate TK Nayak, kiba mihkhmat ïa katei ka Longkmie ki ïathuh hapoh ka Ïing Bishar ba katei ka longkmie dalade ka la poi sha Delhi halor ka nongrim ka jingïoh kam bad naduh katei ka la shah pynbor ban khaiï met kumta ka la dei ruh ka lanot ki kam khaïi met da kaba shah pynbor.
Shuh shuh la pynpaw ruh ba ka Kong Phawa ka la armet ha ka por ba ka la shah kem bad ka la hap ïaid lyngba ki por ba armet hapoh ka jingshah set Patok. Kumta naduh katei, ka Kong Drabhamon Phawa ka la kha khyllung ha kaba I khun jong ka ruh I la donlang mynta hapoh Patok bad ka.
Dei ban don ki awareness program hapoh Ri khasi jong ngi , lah juh iohsngew borobor ba ki samla jong ngi , ki shah ialam bakla , khamtam ki ba na nongkyndong .