Lait 17,sah 3 ki heh ka HANM, kynthup U President

Shillong, 27 Nailur:
Napdeng ki 20 ngut ki dkhot jong ka HANM kynthup u nongniah taksi ba la rah da ki pulit na ophis treikam jong ka HANM kaba don ha Mawkasiang, hynni ka sngi 17 ngut ki la lait, hynrei ki 3 ngut ki nongialam ba kham hakhmat kynthup u President jong ka seng kmie bah Lamphrang Khar bani kim pat lait satia.
Ki 2 ngut kiwei pat ki nongialam ka HANM ki bym pat lait haduh mynta ki long u bah Arphul Kharbani uba dei u President jong ka HANM West Khasi Hills bad u bah Alban K Gashnga uba la la jied thymmai kum General Secretary jong ka HANM sengkmie.
Na ki khubor ba la ioh lum la iathuh ba ia u Bah Arphul la pynngat halor ki jingjia shah thang ophis ha West Khasi Hills katba ia u bah Lamphrang Kharbani bad u bah Ganshnga ym pat pyllait satia bad hap ban pyllait da ka jamin hadien ba la lap ia ki jingthoh sms hapdeng jongki kiba thmu ban shna ia ka dur tyngshop jong u Dr. Mukul Sangma na ka bynta ban thang.
Na ka liang jong u bah Mariohom Kharkrang SP jong ka East Khasi Hills District u la iathuh ba, ia ki 2 ngut ki nongialam ka HANM kata u bah Lamphrang Kharbani bad u bah Alban K Gashnga, la kem da ki pulit jong ka East Khasi Hills katba ia u bah Arphul Kharbani la kem da ki pulit jong ka Nongstoin, West Khasi Hills.
U la iathuh ba, ia ki 17 ngut la pyllait noh hadien ba ym shym la lap satia ba kin don bynta ha kino kino ki mukotduma, hynrei ia kitei ki 3 ngut la kem noh bad um shym la iathuh shai satia halor ki mukotduma aiu la kem ia kine ki 3 ngut ki nongialam.