Lai tyngka shi phut sawdong, ka bai kudam ha Mawiong

Shillong, 12 Nailur:
Ka dor jong ka bai wai na ka bynta ban ioh kudam ha iew Dielang ha Mawiong ba la pyniaid da ka Meghalaya State Agricultural Marketing Board (MSAMB) ka shong dor T. 3 shi phut sawdong.
Ki kudam ki don 51 tylli ha katei ka iew Dielang bad kiba bun kiba ioh dukan ki dei ki kharkaia bad duna bha ki Khasi.
Katkum ka jingia kren bad u ophsar ba peit ia katei ka iew, la iathuh ba ia ki kudam la ai snem na ka bynta kito ki briew ne ki nongkhaii kiba thied mar ba kin buh ia ki mar rep ha ki kudam jongki.
“Ngi ai wai ia ki kudam ha ka dor T. 3 shi phut sawdong bad ka dork an long katkum ka jing heh ka kudam”, la ong u secretary ka MSAMP u bah W Marbaniang haba iakren bad u Rupang hyn ne ka sngi Thohdieng.
U la iathuh ba ia ki mar rep, la shim khajna na ki nongkhaii ne ki kharkaia ha ka dor shi percent na ka 100 kilo.
Ki mar rep kiba wan poi ban die da ki nongrep ha katei ka iew, kiba kham kongsan ki long kum u synshar, sla tyrpad, phan nalor kiwei pat ki mar rep. ka Board kam shym la shim khajna na ki nongrep hynrei tang ka khyrdop ka KHADC kaba shim khajna ia ki kali kiba wan die ia ki mar rep.
Ha kajuh ka por, u la iathuh ba ka iew kaba kham kongsan ka dei ha ka por ba wan die ia u synsar naduh u bnai Lber haduh Jymmang. U la iathuh ba ka dor jong u synshar ha u bnai Lber ka long T. 50 shi kilo bad mynta u la poi sha ka dor T. 80 tam shi kilo. Katkum ka jingiathuh une u ophisar, ka sla tyrpad ruh ka la kiew dor khyndiat bad u phan ruh.
Ha kawei ka liang, la iathuh ba ka sorkar kam lah ban tuklar halor ki dor jong ki mar rep bad ia ki dor jong ki mar rep la pyniaid da ki kharkaia.
Ki nongrep ki ba wan ban die ia ki mar rep jongki ha katei ka iew ka dor jong ki mar rep, ka shong ha ka bor jong u Kharkaia ban buh ia ka dor jong ki mar rep.
Tang lada ki nongrep ki shah thok shah shukor ha kano kano ka liang ka ba iadei bad ki mar rep ki lah ban ai da ka jingujor sha ka Marketing Committee.