Shillong: Ki paidbah nongshong shnong ha ki shnong kiba don ha ka thain Sepngi jong ka Dong Ri Bhoi, ki la mad ia ka jingeh kaba khraw bad kata ka long hadien ba ki la hap ban shongdum khlem bording mynta la lai miet kynthih.
Ka jingtip kaba la ioh ban lum na ki paidbah jong katei ka thain, la iathuh ba katei ka jinglip bording ka la jia ha ka miet Sngi Nyngkong bad khlem da tip ia ka daw, hynrei haduh mynta hi ka bording ha ki shnong kiba don ha katei ka thain kam pat poi satia.
La ioh ruh ia ka jingtip ba ha katei ka jinglip bording, ka la ktah ia ki spah tylli ki shnong kiba don ha katei ka thain bad wat sha kito ki shnong kiba don ha khappud ka Meghalaya-Assam.
Haba iadei bad katei ka jinglip bording, ki paidbah kiba sah ha katei ka thain ki la pynpaw ia ka jingsngewkhia bad ha kajuh ruh ka por ki la pynpaw ia ka jingbitar, namar ba ki la shah ktah lut ha kiba bun ki rukom treikam.
Katba na ka liang ka HYC, Ri Bhoi Sepngi, lyngba u Alfred Lyngdoh, ka la pynrem jur halor katei ka jinglip bording kaba Lai miet kynthih, ha kaba u la ong ba ka seng hi kam lah ban pdiang ia kaba kum katei ka jinglip bording, kaba la wanrah ia ka jingduhnong ia ki spah tylli ki shnong kiba don ha katei ka thain, kaba dei ruh ka thain ba dang sahdien jong ka them Ri Bhoi.
Phi don ban ong eiei?