Lai bnai ai por u muktiar, ban khang ïa ka khyrdop ha rilum Pnar

Shillong:U Ma Kynjaimon Amse u muktiar na East Jaintia Hills, myn hynnin ka sngi u la aipor ïa ka National Highway Authority of India (NHAI) ba ka dei ban khang noh ïa kawei napdeng ki Toll Gate kaba don ha rilum Pnar hapoh 3 bnai bad lada kane kam urlong na ka liang jong u u ïathuh ba un ïaid kat kum ki kyndon aiñ namar kane ka la long be-ain.

Kat kum ki kyndon ka The National Highways Fee (Determination of Rates and Collection) Rules 2008 ki kdew shai ba ki toll gate kim dei ban don palat ban ïa kawei hapoh ka 60 KM jong ka surok National Highway ong une u muktiar.

Ha ka shithi ba u la phah sha u Project Director of NHAI, Shillong ha ka 4 tarik Ïaiong u Ma Kynjaimon Amse u la kdew ruh na ka jingkren u Myntri ba peit ïa ka leit ka wan lyngba ki surok(Ministry of Road Transport) hapoh ka ïing dorbar Lok Sabha ha ka 22 u Lber 2022. Ha ka jingkren jong u Nitin Gadkari u Myntri ba peit ïa ka leit ka wan lyngba ki surok u la ong ba kawei ka toll gate kam dei ban duna ïa ka 60 KM ka jingjngai na kawei pat ha ki surok National Highway bad ka sorkar kan pyntikna ba kan khang ïa ki toll gate hapoh lai bnai kiba ka jingdon jong ki kam palat ïa ka 60 KM kawei na kawei.

“Namarkata kumba la ai jubab u Myntri ha ka ïing dorbar nga kyrpad ba na ka liang jong phi phin sngewbha ban khang noh kawei na ki toll gate ba don ha Jaintia Hills kata ïa ka Ialong (Pasyih) lane ka Lumshnong toll gate hapoh kane ka lai bnai” ong u Kynjaimon Amse.
“lada ka jinglum pisa ka dang bteng hadien ba kut kane ka lai bnai ka la long ka kam be-ain bad ka long ruh pyrshah ïa ki aiñ ka NHAI bad ka dei ka kamram jong phi ban leh eiei ïa kane bad lada phim leh eiei haba kut kane ka por na ka liang jong nga ngan shim da ki lynti kiba ka aiñ ka ailad” ong shuh shuh u Ma Kynjaimon Amse.

Kumba long mynta ka jingdon ka toll gate ha Ialong (Pasyih) bad Lumshnong ka long tang 53 KM ka jingjngai kawei na kawei iathuh u Ma Kynjaimon Amse.