Ka Real Madrid ka la jop da 2-1 pyrshah ia ka Villarreal bad da katei ka jingjop, ka la ioh rah ia ka thong jong ka La Liga.
Ka Real, ka la jop hynnin ka sngi, ha ka jing ialehkai ha la iing, ha kaba ia ki kol, la ioh thep da U Karim Benzema, uwei na ki nongthep kol ba satar jong ka Real Madrid.
Ka Real ka ioh 86 point, na ki 37 tylli ki jingialehkai bad ka tam da hynniew point ia ka Barcelona, hadien ba ka la shah pynliem da 2-1 ha ka Osasuna.
U Benzema, ula ioh thep kol nyngkong ha ka minit kaba 29, ha kaba ula ioh ban phrung ia ka bol, na ki khohwah jong U Sergio Asenjo, uba dei u nongap kol jong ka Villareal bad ha ka minit kaba 77, U Benzema, ula ioh sa ia ka jingshut penalty bad katei ka dei ruh ka kol jong ka jingjop, kaba dei ruh ka sien jop, ha ka sien kaba shiphew, naduh ba ka sdang biang ka jingialehkai, naduh ba la pynsangeh na ka daw jong ka khlam Covid 19.
Ka Villarreal, ka la ioh ban thep dier por ia kawei ka kol sha ka jar jong ka Real, lyngba U Vicente Iborra bad ka la dei ruh ban thep ia ka kol ban pyn ia khaid, ha ka jingaipor shuh shuh, hynrei la ka kol, ka dei ka offside.
Phi don ban ong eiei?